Kosova pranohet në Asociacionin e Ombudspersonëve frankofonë

Institucioni i Avokatit të Popullit është bërë anëtar me të drejta të plota në Asociacionin e Ombudspersonëve dhe Ndërmjetësuesve të Frankofonisë

Në Kongresin e 9-të të Asociacionit të Ombudspersonëve dhe Ndërmjetësuesve të Frankofonisë (AOMF) që u mbajt në Quebec të Kanadasë, Institucioni i Avokatit të Popullit (IAP) i Republikës së Kosovës, u pranua anëtar me të drejta të plota në këtë asociacion.

Kërkesa e Avokatit të Popullit të Kosovës për anëtarësim në këtë asociacion, siç thuhet në një njoftim për media, u përcoll përmes raportit të kryetarit të Komitetit të Aderimeve, Marc Betrand, në ditën e tretë të punimeve të këtij Kongresi.

Në pranimin e Kosovës në këtë institucion, sipas njoftimit, ndihmë të jashtëzakonshme ka dhënë Avokati i Popullit i Shqipërisë, Igli Totozani dhe bashkëpunëtorët e tij.

Punimet e kongresit u mbyllën me miratimin e Deklaratës së Quebec-ut e cila bën thirrje për forcimin dhe konsolidimin e institucioneve të ndërmjetësimit (Ombudsmanëve) si promovues të vlerave demokratike, sundimit të ligjit dhe respektimit të të drejtave të njeriut.

IAP është i vetmi institucion kombëtar për të drejtat e njeriut në Kosovë. Si i tillë, deri më tani është anëtarësuar në Institutin Ndërkombëtar të Ombudsmanëve (IOI), Institutin Evropian të Ombudsmanëve (EOI), Rrjetin Evropian të Institucioneve Kombëtare për të Drejtat e Njeriut (ENNHRI), Rrjetin e Ombudsmanëve për Fëmijë të Evropës Juglindore (CRONSEE), Deklaratën e Sarajevës për Bashkëpunim Rajonal.

“Anëtarësimi në Asociacionin e Ombudsmanëve dhe Ndërmjetësuesve të Frankofonisë (AOMF) është një hap i radhës në strukturat ndërkombëtare për të drejtat e njeriut, përderisa është në pritje të përgjigjes pozitive për anëtarësim në Asociacionin e Ombudsmanëve të Mesdheut (AOM), ku ka aplikuar vitin e kaluar”, thuhet në deklaratën e Avokatit të Popullit të Kosovës, Hilmi Jashari.