Autoritetet italiane kanë ndërmarrë një operacion të gjerë policor në 18 qytete të vendit, pas protestave të dhunshme të 17 dhe 18 tetorit, të cilat u shoqëruan me përleshje, dëmtime të pronës dhe plaçkitje të dyqaneve.
Sipas të dhënave të Policisë së Shtetit italian, njësitë hetimore Digos kanë kryer kontrolle personale dhe banesash ndaj rreth 100 personave të identifikuar gjatë trazirave, prej të cilëve 51 janë të mitur, përcjell albinfo.ch.
Operacionet janë zhvilluar në qytete të ndryshme, përfshirë Barin, Bolonjën, Bergamon, Firencen, Gjenovën, Napolin, Veronën dhe Monzën. Gjatë kontrolleve, policia ka sekuestruar mjete të forta, armë të ftohta, municione, maska, pajisje elektronike dhe sende që dyshohet se janë marrë nga dyqanet gjatë trazirave.
Ndërkohë, Milano po përgatitet për një tjetër ditë protestash, të paralajmëruara për të shtunën, më 24 tetor. Autoritetet kanë shtuar masat e sigurisë në qendër të qytetit dhe në zonat ku priten grumbullime, për të parandaluar përsëritjen e incidenteve të fundjavës së kaluar.
Në kuadër të masave të sigurisë është paraparë edhe angazhimi i 500 ushtarëve shtesë, ndërsa policia po monitoron thirrjet për mobilizim që po shpërndahen përmes rrjeteve sociale dhe grupeve të komunikimit.
Protestat e fundit në Itali janë nxitur nga pakënaqësitë lidhur me koston e jetesës dhe çështje të tjera sociale e politike. Megjithatë, një pjesë e demonstratave është shoqëruar me akte dhune, duke nxitur hetime dhe masa shtesë të sigurisë.
Autoritetet italiane po vazhdojnë hetimet për të identifikuar përgjegjësit e incidenteve, ndërsa mbetet për t’u parë nëse protestat e paralajmëruara për fundjavën do të zhvillohen pa përplasje.
