Gjermania planifikon të shtrëngojë kriteret për kalimin e testit të gjuhës gjermane, i cili kërkohet në kuadër të procedurave të integrimit dhe mund të ndikojë në rrugën drejt lejes së qëndrimit të përhershëm dhe shtetësisë gjermane, raporton albinfo.ch.
Sipas gazetës gjermane Bild, ndryshimi vjen pas zbulimit të rasteve të mashtrimit gjatë provimit të gjuhës për emigrantët (DTZ). Dyshohet se disa pjesëmarrës në kurset online të integrimit kanë siguruar në mënyrë të paligjshme pyetjet dhe përgjigjet e sakta për pjesët e dëgjimit dhe leximit.
Me rregullat e reja, kandidatët do të duhet të dëshmojnë njohuri në tri fusha: dëgjim dhe lexim, shkrim dhe të folur. Për të kaluar provimin, do të jetë e domosdoshme të arrihet të paktën niveli A2 edhe në fushën ku kandidati ka rezultatet më të dobëta.
Deri më tani, kandidatët mund ta kalonin provimin edhe nëse nuk arrinin rezultate të mjaftueshme në shkrim, nëse plotësonin kushtet në pjesët e tjera dhe në provimin me gojë.
Ndryshimet synojnë të rrisin besueshmërinë e testimit dhe të sigurojnë që kandidatët të kenë njohuri të mjaftueshme të gjuhës gjermane në të gjitha aftësitë e kërkuara. Rregullat e reja për provimet e kurseve të integrimit pritet të zbatohen nga 1 nëntori./Albinfo.ch
