Rritja e kostove të banimit vazhdon të jetë një sfidë për shumë familje në Zvicër. Sipas një studimi të ri të platformës zvicerane të krahasimit të çmimeve Comparis, rreth 16% e banorëve shpenzojnë më shumë se një të tretën e të ardhurave bruto për banim, përcjell albinfo.ch.
Studimi, i realizuar në gusht të vitit 2026 me pjesëmarrjen e 1.038 personave, tregon se situata është veçanërisht e vështirë për qiramarrësit, ku 22% e tyre tejkalojnë kufirin e rekomanduar të shpenzimeve për banim.
Sipas rregullit të përgjithshëm të përdorur në Zvicër, shpenzimet për banim nuk duhet të tejkalojnë një të tretën e të ardhurave bruto të një familjeje. Tejkalimi i vazhdueshëm i këtij kufiri mund të krijojë vështirësi financiare dhe të ndikojë në mbulimin e nevojave të tjera.
Të dhënat tregojnë se familjet me të ardhura më të ulëta përballen me barrën më të madhe financiare.
Rreth 36% e familjeve me të ardhura bruto deri në 4.000 franga në muaj shpenzojnë më shumë se një të tretën e tyre për banim. Ndërkaq, te familjet me të ardhura mbi 8.000 franga, kjo përqindje bie në vetëm 6%.
Vështirësitë nuk kufizohen vetëm te qiramarrësit. Sipas studimit, edhe 7% e pronarëve të banesave shpenzojnë më shumë se një të tretën e të ardhurave për kostot e banimit.
Megjithatë, pronarët në përgjithësi kanë shpenzime më të ulëta mujore për banim sesa qiramarrësit. Rreth gjysma e pronarëve shpenzojnë më pak se 1.500 franga në muaj, ndërsa te qiramarrësit kjo përqindje është 36%.
Eksperti i pasurive të paluajtshme në Comparis, Harry Büsser, paralajmëron se familjet që vazhdimisht shpenzojnë më shumë se një të tretën e të ardhurave për banim mund të detyrohen të kufizojnë shpenzimet për nevoja të tjera të rëndësishme, përfshirë kujdesin shëndetësor dhe kursimet për pension.
Sipas tij, megjithëse pronësia e banesës mund të duket më e favorshme nga pikëpamja e shpenzimeve mujore, duhet të merren parasysh edhe kostot e mirëmbajtjes, renovimit dhe kapitali i investuar në pronë.
Rezultatet e studimit nxjerrin në pah presionin financiar që kostot e banimit ushtrojnë mbi një pjesë të popullsisë zvicerane, veçanërisht mbi familjet me të ardhura modeste./Albinfo.ch
