Tetë persona janë paraqitur në spitalet universitare në Tiranë për të marrë trajtim mjekësor, pasi janë lënduar gjatë protestës së sotme.
Sipas të dhënave paraprake të Ministrisë së Shëndetësisë dhe Mirëqenies Sociale, mes të lënduarve janë një deputet i Kuvendit të Shqipërisë, një zyrtar policor, dy përfaqësues të mediave dhe katër protestues.
Në Qendrën Spitalore Universitare “Nënë Tereza” (QSUT) janë paraqitur gjashtë persona: deputeti, një përfaqësuese e medias dhe katër protestues. Ministria ka njoftuar se të gjithë kanë marrë trajtimin e nevojshëm dhe më pas janë larguar nga spitali.
Ndërkaq, në Spitalin Universitar të Traumës (SUT) kanë kërkuar trajtim mjekësor një polic dhe një përfaqësues i medias.
Protesta në Tiranë vijon mes tensioneve, ndërsa është sulmuar me fishekzjarrë selia e Partisë Socialiste.
Ndërkohë, po ashtu pranë Bankës së Shqipërisë janë hedhur fishekzjarrë në drejtim të efektivëve të policisë.
Policia i është kundërpërgjigjur me gaz lotsjellës dhe ujë me presion, për t’i larguar.
Situata në kryeqytet mbetet e tensionuar, me incidente të raportuara në disa zona të qytetit.
Gjatë protestës, grupe protestuesish kanë hedhur lëndë piroteknike drejt efektivëve, ndërsa policia është kundërpërgjigjur me gaz lotsjellës.
Më herët, janë raportuar edhe djegie të koshave të mbeturinave në rrugë dhe përplasje mes protestuesve dhe efektivëve
