Ganimet Shala vazhdon angazhimin e saj në jetën politike dhe institucionale të Sllovenisë, duke u bërë pjesë e garës për zgjedhjet lokale që do të mbahen më 15 nëntor 2026, shkruan albinfo.ch.
Politikania shqiptare nga Peja, e cila jeton dhe vepron prej vitesh në Lubjanë, është renditur në pozitën e dytë në listën e Socialdemokratëve (SD) për Këshillin Bashkiak të Komunës së Lubjanës.
Kandidatura e saj vjen në kuadër të një gare ku Socialdemokratët kanë prezantuar një listë prej 45 kandidatësh, me përfaqësues nga fusha të ndryshme të jetës publike, shoqërisë civile, sindikatave dhe komuniteteve lokale.
Në materialin e prezantimit të kandidatëve, partia thekson përfaqësimin e banorëve nga të gjitha pjesët e Lubjanës, përfshirjen e gjeneratave të ndryshme dhe rëndësinë e pjesëmarrjes në jetën e komunitetit.
Për Shalën, kjo kandidaturë përfaqëson një tjetër etapë në angazhimin e saj politik në Slloveni, ku ajo ka ndërtuar një rrugëtim të gjatë në jetën publike dhe institucionale.
Si asambleistja e parë shqiptare në Parlamentin e Lubjanës, ajo përfaqëson një prani të veçantë të komunitetit shqiptar në institucionet lokale të kryeqytetit slloven.
Nga angazhimi lokal te përfaqësimi evropian
Përvoja e Shalës shtrihet edhe përtej politikës lokale. Ajo ka mbi 30 vjet përvojë në sektorin publik në Slloveni, ndërsa është angazhuar edhe në çështje që lidhen me bashkëpunimin ndërkombëtar dhe proceset demokratike.
Në këtë kuadër, ajo ka marrë pjesë në misione të vëzhgimit të zgjedhjeve në Bosnjë e Hercegovinë, Estoni dhe Suedi, si dhe në sesionet e Kongresit të Autoriteteve Lokale dhe Rajonale të Këshillit të Evropës në Strasburg.
Së fundmi, gjatë sesionit të 51-të të këtij Kongresi, Ganimete Shala është emëruar raportuese për forcimin e zërave të fëmijëve, një përgjegjësi që lidhet me promovimin e pjesëmarrjes së tyre në vendimmarrje dhe në çështjet që ndikojnë në jetën e tyre.
Përveç angazhimit institucional, ajo ka qenë aktive edhe në organizimin e komunitetit shqiptar në Slloveni, ndërsa ka themeluar Shoqatën e Grave Shqiptare „Teuta“, përmes së cilës ka kontribuar në organizimin dhe fuqizimin e grave shqiptare.
Zgjedhjet lokale të 15 nëntorit do të jenë një tjetër moment i rëndësishëm në rrugëtimin e saj politik në Slloveni. Kandidimi në pozitën e dytë të listës së Socialdemokratëve e vendos atë në mesin e kandidatëve që synojnë përfaqësimin në Këshillin Bashkiak të Lubjanës./Albinfo.ch
