Në Ambasadën e Republikës së Kosovës në Austri, më 24 tetor 2026, është zhvilluar një takim me përfaqësuesit e Shoqatës së Mësuesve Shqiptarë “Naim Frashëri”, albinfo.at.
I Ngarkuari me Punë, Albinot Bimbashi, së bashku me diplomatët Valon Krasniqi, Dhurata Selimi dhe Marigonë Vrajolli, pritën kryetarin e Shoqatës, Osman Ademi, si dhe mësimdhënësit Ibrahim Hasanaj, Miradije Berisha, Lumturie Bytyqi, Ina Arapi, Feride Aradini dhe Besa Morina.
Gjatë takimit u diskutua për rëndësinë e ruajtjes dhe zhvillimit të mësimit në gjuhën shqipe për fëmijët shqiptarë në Austri, si dhe për sfidat me të cilat përballen mësimdhënësit gjatë këtij procesi.
Vëmendje e veçantë iu kushtua rritjes së numrit të nxënësve që ndjekin mësimin në gjuhën shqipe dhe përmirësimit të kushteve për zhvillimin e tij.
Në përfundim të takimit, përfaqësuesve të Shoqatës iu dorëzuan libra shkollorë për klasat I–IX, të cilët do të përdoren nga nxënësit shqiptarë në Austri.
Takime të tilla synojnë të forcojnë bashkëpunimin institucional me mësimdhënësit dhe shoqatat shqiptare në diasporë, në mbështetje të ruajtjes së gjuhës amtare te brezat e rinj./Albinfo.at
