Më 22 nëntor 2026, në Oberhausen të Gjermanisë, do të organizohet koncerti festiv “Dita e Alfabetit Shqip”, një ngjarje e veçantë kulturore dhe muzikore që do të bashkojë artistë të njohur shqiptarë dhe bashkatdhetarë nga diaspora.
Koncerti do të mbahet në sallën Luise-Albertz-Halle në Oberhausen, duke filluar nga ora 18:00, dhe organizohet në kuadër të Westbalkantage NRW 2026, me synimin për të promovuar kulturën, gjuhën dhe traditat shqiptare.
Në këtë mbrëmje festive, publiku do të ketë mundësinë të shijojë performancat e grupit të njohur Elita 5 & Friends, si dhe të artistëve Mustafa Imeri, Miranda Hashani dhe Jenona Shaqiri & Band, të cilët do të sjellin një program të pasur muzikor dhe atmosferë festive, shkruan albinfo.ch.
Ngjarja i kushtohet Ditës së Alfabetit Shqip, e cila shënohet çdo vit më 22 nëntor, në përkujtim të Kongresit të Manastirit të vitit 1908, një prej ngjarjeve më të rëndësishme në historinë e gjuhës dhe identitetit kombëtar shqiptar.
Njëri nga organizatorët, Afrim Farizi, ka bërë të ditur se koncerti synon të mbledhë bashkatdhetarët në një mbrëmje të përbashkët festive, duke vënë në pah rëndësinë e ruajtjes dhe promovimit të gjuhës shqipe, kulturës dhe trashëgimisë kombëtare në diasporë.
Koncerti “Dita e Alfabetit Shqip” do të mbahet më 22 nëntor 2026, nga ora 18:00, në Luise-Albertz-Halle, Oberhausen, Gjermani.
