Leart Jahaj, i lindur në Shqipëri dhe i rritur në Shtetet e Bashkuara, është shpallur fitues i Goldwater Scholarship 2026, një prej bursave më prestigjioze amerikane për studentët universitarë në shkencat natyrore, matematikë dhe inxhinieri, shkruan albinfo.ch.
Student i kimisë në Providence College, Jahaj është përzgjedhur mes 454 fituesve nga 1,485 kandidatë në gjithë SHBA-në. Ai është angazhuar në kërkime mbi ndotjen e ajrit dhe përbërjen kimike të grimcave atmosferike, ndërsa është edhe bashkautor i një studimi të publikuar në revistën shkencore ACS Omega.
Në kuadër të zhvillimit të tij shkencor, Jahaj është përfshirë edhe në Student Airborne Research Program të NASA-s, ku studentët punojnë me të dhëna dhe projekte që lidhen me Tokën, atmosferën dhe mjedisin.
Pas studimeve universitare, ai synon të vazhdojë me doktoraturë në kimi dhe të fokusohet në kërkime shkencore me ndikim në mbrojtjen e mjedisit.
