Një ngjarje e rëndë ka tronditur qytetin e Chiarit, në provincën e Breshias në Itali, ku një 21-vjeçar shqiptar dyshohet se ka vrarë me thikë nënën e tij, 39-vjeçare, përcjell albinfo.ch.
Sipas mediave italiane, ngjarja ka ndodhur mbrëmjen e kaluar në banesën familjare, në rrugën Via Tagliata. Pas incidentit, i riu është larguar nga banesa, ndërsa më pas ka njoftuar autoritetet për atë që kishte ndodhur.
21-vjeçari, i lindur në San Bonifacio të Veronës, është paraqitur mëngjesin e sotëm në kazermat e Karabinierëve në Kremona, ku është dorëzuar vullnetarisht.
Pas marrjes së njoftimit, forcat e policisë kanë mbërritur në banesën familjare, ku kanë gjetur trupin e pajetë të 39-vjeçares.
Në vendngjarje kanë ndërhyrë edhe specialistët e Seksionit të Hetimeve Shkencore të Komandës Provinciale të Karabinierëve në Breshia, të cilët kanë kryer ekzaminimet për mbledhjen e provave dhe rindërtimin e dinamikës së ngjarjes.
Ndërkohë, autoritetet italiane kanë nisur hetimet për të sqaruar rrethanat e plota të kësaj tragjedie familjare dhe motivet që mund të kenë çuar në krim.
Deri më tani, nuk janë bërë publike detaje të tjera lidhur me shkaqet e ngjarjes, ndërsa hetimet vijojnë. /Albinfo.ch
