Lenon Osmani, student i Informatikës në Universitetin Teknik të Grazit (TU Graz), është në mesin e të nominuarve për çmimin “Köpfe des Jahres” (Personalitetet e Vitit), që organizohet nga gazeta austriake “Kleine Zeitung”, transmeton albinfo.at.
Osmani është nominuar në kategorinë “Newcomer”, me videolojën e tij “Qwick”, përmes së cilës ka prezantuar idetë dhe kreativitetin e tij në fushën e teknologjisë dhe inovacionit.
Ky nominim përbën një vlerësim për angazhimin dhe potencialin e studentit shqiptar në fushën e informatikës, duke e vendosur atë në mesin e kandidatëve që garojnë për këtë çmim në rajonin e Steiermarkut në Austri.
Për të mbështetur Lenon Osmanin, votimi është i hapur deri më 8 dhjetor 2026. Të interesuarit mund të votojnë një herë në ditë, duke zgjedhur rajonin “Graz und Umgebung”, kategorinë “Newcomer” dhe emrin “Lenon Osmani”, në mesin e kandidatëve të nominuar.
Votimi realizohet përmes platformës zyrtare të “Kleine Zeitung”, ndërsa pas votimit duhet të konfirmohet edhe adresa elektronike përmes lidhjes që dërgohet në email. Vetëm pas këtij konfirmimi vota konsiderohet e vlefshme.
Familja dhe rrethi i tij u kanë bërë thirrje shqiptarëve në Austri, Kosovë dhe më gjerë që ta mbështesin Lenonin me votën e tyre, duke e konsideruar këtë nominim një moment të rëndësishëm në rrugëtimin e tij akademik dhe krijues./Albinfo.ch
Votimi online: https://koepfe.kleinezeitung.at/voting/steiermark
