Robotët pritet të marrin përsipër një pjesë të punëve të vështira dhe të rrezikshme në tunelet hekurudhore Gotthard dhe Monte Ceneri. Projekti synon të përshpejtojë mirëmbajtjen dhe të rrisë sigurinë e punëtorëve.
Hekurudhat Federale Zvicerane (SBB) po shqyrtojnë mundësinë e përdorimit të robotëve për mirëmbajtjen e tuneleve hekurudhore Gotthard dhe Monte Ceneri.
Sipas SBB-së, kjo teknologji do të mundësonte kryerjen më të shpejtë dhe më efikase të punimeve të mirëmbajtjes, duke përmirësuar njëkohësisht sigurinë e personelit.
Robotët që planifikohet të përdoren kanë madhësinë e një qeni të racës Shën Bernar dhe janë të pajisur me një krah të palosshëm, përmes të cilit mund të kryejnë detyra të thjeshta, si shtyrja dhe tërheqja e mekanizmave apo hapja dhe mbyllja e dyerve.
Në të ardhmen, synohet që këta robotë të jenë në gjendje të kryejnë një gamë të gjerë punësh të rënda dhe të rrezikshme, të cilat aktualisht duhet t’i realizojnë punëtorët brenda tuneleve.
Kushtet në këto hapësira janë veçanërisht sfiduese, për shkak të temperaturave të larta, pluhurit dhe faktorëve të tjerë mjedisorë. Sfida është edhe më e madhe në tunelin bazë të Gotthardit, i cili ka një gjatësi prej 57 kilometrash për secilin drejtim.
Projekti kërkimor kërkon edhe disa vjet
Projekti është zhvilluar në bashkëpunim ndërmjet Hekurudhave Federale Zvicerane dhe studiuesve ndërkombëtarë nga Shkolla Politeknike Federale e Lozanës (EPFL).
Megjithatë, zbatimi i plotë i tij nuk pritet të ndodhë së shpejti, pasi do të nevojiten edhe disa vjet zhvillim dhe testime.
Robotë të ngjashëm përdoren tashmë në disa sektorë, veçanërisht në platformat e naftës. Deri më tani, përdorimi i tyre është kufizuar kryesisht në vëzhgimin dhe diagnostikimin e gjendjes së pajisjeve dhe instalimeve.
