Lulzim Shala, me rrënjë nga Lipjani i Kosovës, është kandidat për deputet në Parlamentin e kantonit Fribourg, Grand Conseil, nga radhët e Partisë Liberale-Radikale (PLR).
Shala, i cili në raportimet e shtypit lokal figuron me vendbanim në Rueyres-les-Prés, është prezantuar në mesin e kandidatëve të PLR-së së Broye-s në asamblenë e mbajtur më 11 qershor. Sipas gazetës “La Broye”, kjo degë e partisë synon t’i ruajë tri ulëset e saj në parlamentin kantonal.
Angazhimi i tij në garat zgjedhore përfshin edhe nivelin komunal. Emri i Lulzim Shalës figuron në listën e PLR-së për zgjedhjet e vitit 2026 për Këshillin e Përgjithshëm të Estavayer-së, organi legjislativ i komunës.
Në mesazhin promovues të kandidaturës së tij theksohet rëndësia e pjesëmarrjes së komunitetit shqiptar në jetën institucionale të Zvicrës dhe e përfaqësimit të tij në politikën kantonale.
Zgjedhjet për Grand Conseil do të mbahen të dielën, më 8 nëntor 2026. Në të njëjtën ditë, qytetarët me të drejtë vote në kantonin Fribourg do të zgjedhin edhe anëtarët e qeverisë kantonale dhe prefektët.
