Presioni i administratës amerikane ndaj kompanive farmaceutike për uljen e çmimeve të barnave mund të sjellë pasoja financiare për Zvicrën. Një studim i ETH Cyrih dhe Universitetit të Cyrihut paralajmëron se, nëse kompanitë arrijnë t’i rrisin çmimet në tregjet e tjera për të kompensuar humbjet në SHBA, kostot shtesë për të siguruarit zviceranë mund të arrijnë në qindra miliona franga në vit.
Shtetet e Bashkuara po synojnë të zbatojnë politikën e “kombit më të favorizuar”, duke krahasuar çmimet e barnave në tregun amerikan me ato në vende të tjera, përfshirë Zvicrën.
Kjo politikë po ushtron presion mbi gjigantët farmaceutikë zviceranë Roche dhe Novartis, të cilët mund të përballen me ulje të të ardhurave në tregun amerikan dhe, si kundërpërgjigje, të kërkojnë çmime më të larta në vendet e tjera.
Studiuesja Kerstin Vokinger paralajmëron se kjo situatë mund të nxisë konkurrencë mes shteteve për rritjen e çmimeve të barnave, duke përfituar industria farmaceutike dhe duke rënduar financiarisht pacientët.
Ndërkohë, shoqata e industrisë farmaceutike zvicerane Interpharma argumenton se rritja e çmimeve është e nevojshme për të garantuar vazhdimin e furnizimit me barna inovative. Megjithatë, Zyra Federale e Shëndetit Publik në Zvicër vlerëson se një rritje e përgjithshme e çmimeve nuk është e justifikuar, pasi zbatimi i politikës së re amerikane mbetet ende i pasigurt.
Studimi rekomandon bashkëpunim ndërmjet shteteve për të shmangur një garë të mundshme të rritjes së çmimeve. Sipas autorëve, nëse vendet e tjera i rrisin çmimet për t’iu përshtatur kërkesave të industrisë, rezultati mund të jetë rritja e kostove edhe jashtë SHBA-së.
