Një tjetër donacion me pajisje shkollore është nisur nga Suedia drejt Kosovës. Bëhet fjalë për kamionin e 59-të me radhë, i organizuar nga KIF Liria, i cili këtë herë do të dërgojë pajisje shkollore për Komunën e Malishevës, transmeton albinfo.ch.
Përmes këtij aktiviteti, KIF Liria po vazhdon angazhimin e saj në mbështetje të institucioneve arsimore në Kosovë, duke kontribuar në përmirësimin e kushteve për nxënësit dhe në pajisjen e shkollave me materiale të nevojshme.
Organizatorët kanë shprehur mirënjohje për të gjithë kontribuuesit që ndihmuan në realizimin e këtij donacioni, si dhe për bashkëpunimin me Komunën e Växjö-së. Një falënderim i veçantë i është drejtuar edhe Lasse Karlsson për mbështetjen e tij.
Me 59 kamionë të dërguar deri më tani, KIF Liria po dëshmon vazhdimësinë e një angazhimi solidar të diasporës shqiptare në Suedi, në shërbim të komuniteteve dhe brezave të rinj në Kosovë./Albinfo.ch
