Ana Hoti dhe Elsa Halilaj janë kthyer nga Italia me vlerësime të rëndësishme nga festivali ndërkombëtar “Hybla Music Contest”, ku ishin të vetmet konkurrente që përfaqësuan Kosovën, transmeton albinfo.ch.
Në një konkurrencë të fortë, me pjesëmarrës nga Kanadaja, Polonia, Italia, Estonia, Bullgaria dhe Spanja, të dyja këngëtaret u vlerësuan me çmime speciale, duke siguruar edhe ftesa për të interpretuar në skena ndërkombëtare.
Ana Hoti fitoi një çmim special, përmes të cilit mori tri ftesa për festivale dhe gara muzikore. Ajo do të marrë pjesë në Festivalin e Këngës “Orpheus” në Malaga të Spanjës, në “Il Cantagiro – Pre Finals” në Itali, ku do ta përfaqësojë Kosovën në shtator të vitit 2027, si dhe në festivalin “Lake Pearls” në Strugë, në gusht të po atij viti.
Edhe Elsa Halilaj u nderua me çmim special, duke siguruar dy ftesa për përfaqësimin e Kosovës në “Il Cantagiro – Pre Finals”, në shtator 2027, dhe në “Lake Pearls” në Strugë, në gusht 2027.
Përtej çmimeve dhe ftesave, pjesëmarrja në këtë festival u ka dhënë dy artisteve të reja mundësinë të fitojnë përvojë, të zhvillohen artistikisht dhe të krijojnë kontakte të reja në skenën muzikore ndërkombëtare.
Suksesi i Anës dhe Elsës në Itali përbën një tjetër prezantim të talentit të ri muzikor nga Kosova në garat ndërkombëtare./Albinfo.ch
