Policia e Kosovës ka bërë të ditur se ka realizuar dy operacione të ekstradimit ndërkombëtar, në drejtime të kundërta: një shtetas gjerman është dorëzuar te autoritetet e vendit të tij, ndërsa një shtetas kosovar është kthyer nga Italia në Kosovë, përcjell albinfo.ch.
Sipas njoftimit zyrtar, shtetasi gjerman me inicialet D. J. është ekstraduar nga Kosova në Gjermani, ku kërkohej nga autoritetet për veprën penale të trafikimit me narkotikë.
Në rastin tjetër, shtetasi kosovar me inicialet B. B. është ekstraduar nga Italia në Kosovë, pasi kërkohej nga institucionet e drejtësisë së vendit për veprat penale të fajdesë dhe detyrimit.
Të dy personat ishin në kërkim ndërkombëtar përmes INTERPOL-it.
Ekstradimet janë realizuar më 4 nëntor, në koordinim mes Drejtorisë për Bashkëpunim Ndërkombëtar Policor, njësive të tjera relevante të Policisë së Kosovës dhe institucioneve të drejtësisë.
Policia ka vlerësuar se këto operacione janë rezultat i bashkëpunimit ndërinstitucional me shtetet partnere në luftimin e kriminalitetit dhe zbatimin e kërkesave ndërkombëtare të drejtësisë./Albinfo.ch
