Ish-presidenti i Shteteve të Bashkuara të Amerikës, Barack Obama, ka reaguar pas rezultateve të zgjedhjeve të mesmandatit, në të cilat demokratët kanë siguruar shumicën në të dy dhomat e Kongresit amerikan, përcjell albinfo.ch.
Përmes një postimi në rrjetet sociale, Obama ka theksuar se rezultatet e zgjedhjeve tregojnë se qytetarët amerikanë kërkojnë një politikë që bashkon dhe jo që përçan shoqërinë.
“Sonte, populli amerikan dërgoi një mesazh të qartë: ata duan politikë që i bashkon njerëzit në vend që t’i përçajë, si dhe udhëheqës që propozojnë zgjidhje konkrete për sfidat me të cilat përballen”, ka shkruar Obama.
Ai ka vlerësuar kandidatët demokratë që garuan në pjesë të ndryshme të vendit, përfshirë edhe zona që tradicionalisht konsideroheshin të vështira për partinë. Sipas tij, pavarësisht prejardhjeve dhe qëndrimeve të ndryshme politike, ata u bashkuan rreth vlerave të përbashkëta dhe angazhimit për shërbimin publik.
Obama ka shprehur mirënjohje edhe për zyrtarët zgjedhorë dhe vullnetarët që kontribuuan në procesin zgjedhor.
Duke iu referuar dy viteve të mbetura të mandatit të administratës aktuale, ish-presidenti ka theksuar se demokratët duhet të përqendrohen te puna dhe përgjegjësitë që i presin.
“Edhe pse kësaj administrate i kanë mbetur ende dy vjet, puna jonë tani është të përveshim mëngët, të bëjmë ndryshime aty ku mundemi, të parandalojmë dëme të mëtejshme dhe të hedhim themelet për të ardhmen”, ka deklaruar Obama.
Në javët e fundit, ish-presidenti kishte marrë pjesë edhe në disa tubime zgjedhore, ku kishte bërë fushatë në mbështetje të kandidatëve demokratë./Albinfo.ch
