Restoranti zviceran Schloss Schauenstein, i drejtuar nga shefi i njohur i kuzhinës Andreas Caminada, është përfshirë sërish në mesin e 50 restoranteve më të mira në botë, transmeton albinfo.ch.
Në renditjen e fundit, restoranti i vendosur në Fürstenau të kantonit të Graubündenit ka zënë vendin e 39-të, duke shënuar përparim në krahasim me renditjen paraprake. Schloss Schauenstein është i vetmi restorant nga Zvicra që figuron në listën e 50 më të mirëve në botë.
Ndërkaq, titullin e restorantit më të mirë në botë këtë vit e ka fituar Asador Etxebarri, i vendosur në Atxondo të rajonit bask në Spanjë.
Renditja bazohet në votat e më shumë se 1.100 anëtarëve të jurisë, të cilët vlerësojnë restorantet nga vende të ndryshme të botës.
Megjithatë, lista prestigjioze nuk ka kaluar pa kritika. Procesi i përzgjedhjes është vënë në pikëpyetje për shkak të pretendimeve lidhur me lobimin dhe ndikimin e mundshëm në rezultatet e renditjes.
Përfshirja e Schloss Schauenstein në këtë listë konfirmon praninë e gastronomisë zvicerane në mesin e destinacioneve të njohura kulinare ndërkombëtare./Albinfo.ch
