Banka Qendrore e Kosovës (BQK) ka dorëzuar zyrtarisht aplikimin për përfshirjen e Kosovës në Zonën e Vetme të Pagesave në Euro (SEPA), një hap që mund të sjellë lehtësira të konsiderueshme financiare për qytetarët dhe bizneset, përcjell albinfo.ch.
Aplikimi është dorëzuar më 6 nëntor, pas një procesi të gjatë përgatitor dhe reformash ligjore, me qëllim përafrimin e sistemit financiar të Kosovës me standardet evropiane.
Sipas vlerësimeve të BQK-së, anëtarësimi në SEPA mund të sjellë kursime prej rreth 55 milionë eurosh në vit, falë uljes së tarifave për transferet bankare ndërkombëtare.
Përfitime të veçanta pritet të kenë qytetarët e Kosovës që jetojnë dhe punojnë në diasporë, përfshirë ata në Zvicër dhe Gjermani, të cilët dërgojnë rregullisht para për familjarët e tyre në Kosovë.
SEPA është një sistem evropian që mundëson realizimin e pagesave në euro në mënyrë më të shpejtë, më të sigurt dhe me kosto më të ulëta. Aktualisht, në këtë hapësirë përfshihen 41 vende, mes tyre shtetet e Bashkimit Evropian, Zvicra dhe Mbretëria e Bashkuar.
Për Kosovën, ku dërgesat e diasporës tejkalojnë një miliard euro në vit, ulja e komisioneve bankare mund të ketë ndikim të rëndësishëm në ekonominë familjare dhe në aktivitetin e bizneseve.
Megjithatë, dorëzimi i aplikimit nuk nënkupton pranimin automatik në SEPA. Autoritetet përkatëse evropiane duhet të shqyrtojnë përputhshmërinë e legjislacionit dhe sistemit financiar të Kosovës me kërkesat e këtij mekanizmi.
Vetëm pas një vendimi pozitiv do të fillojnë procedurat për përfshirjen e bankave dhe institucioneve financiare të Kosovës në skemat evropiane të pagesave.
