Kombëtarja e Kosovës ka siguruar një përforcim të rëndësishëm për repartin defensiv. Mbrojtësi i ri Bleon Kurtulus ka vendosur të përfaqësojë Dardanët në nivelin më të lartë ndërkombëtar, duke iu përgjigjur pozitivisht ftesës së përzgjedhësit Franco Foda, transmeton albinfo.ch.
Kurtulus, 18 vjeç, ka lindur më 24 qershor 2007 në Halmstad të Suedisë dhe konsiderohet një nga talentet premtuese të futbollit suedez.
Hapat e parë në futboll i bëri te Halmstads BK, ku debutoi me ekipin e parë në kampionatin elitar suedez në pranverën e vitit 2024, në moshën vetëm 16-vjeçare.
Zhvillimi i tij profesional vazhdoi me ritëm të shpejtë. Gjatë sezonit 2025, mbrojtësi regjistroi 28 paraqitje në kampionat, duke u shndërruar në një prej lojtarëve të rëndësishëm të skuadrës. Paraqitjet e mira i sollën edhe nominimin për çmimin e lojtarit më të mirë të ri në Suedi.
Interesimi për të nuk mungoi as nga klubet e mëdha suedeze. Në shkurt të vitit 2026, Malmo FF siguroi shërbimet e tij, duke i ofruar një kontratë pesëvjeçare, e cila është e vlefshme deri në dhjetor të vitit 2030.
I gjatë 1.85 metra dhe me këmbë të djathtë, Kurtulus vlerësohet për leximin e lojës, forcën në duelet fizike dhe qetësinë teknike gjatë ndërtimit të aksioneve nga mbrojtja.
Vendimi i tij për të përfaqësuar Kosovën ka edhe një dimension të veçantë familjar. Vëllai i tij, Edvin Kurtulus, kishte qenë kapiten i Kosovës U-21, por në vitin 2022 vendosi të përfaqësonte Kombëtaren A të Suedisë, vendim që në atë kohë nxiti reagime dhe diskutime të shumta.
Ndryshe nga vëllai i tij, Bleon Kurtulus ka zgjedhur një rrugë tjetër. Pavarësisht se ka regjistruar mbi 30 paraqitje me përfaqësueset e grupmoshave të Suedisë, përfshirë edhe U-21, ai ka vendosur që në nivelin më të lartë ndërkombëtar ta përfaqësojë Kosovën.
Me këtë zgjedhje, Kosova fiton një futbollist të ri me perspektivë, i cili mund të kontribuojë në forcimin e repartit defensiv të Dardanëve./Albinfo.ch
