Një hotel tradicional në Zvicër ka ndërprerë aktivitetin pas disa vitesh të vështira, ndërsa tashmë është nxjerrë në shitje për 2.5 milionë franga zvicerane, përcjell albinfo.ch.
Bëhet fjalë për Hotel Toggenburg, një objekt me tri yje në Wildhaus, në kantonin St. Gallen, i cili është mbyllur më 31 tetor dhe aktualisht qëndron i zbrazët.
Pronari i hotelit, Paul Beutler, 80 vjeç, ka vendosur ta shesë pronën, por gjetja e një blerësi të përshtatshëm po paraqitet si sfidë. Sipas raportimit, pavarësisht interesimit të shfaqur, ai ka marrë edhe oferta të cilat i konsideron të dyshimta dhe të papranueshme.
Beutler nuk dëshiron të pranojë propozime të tilla dhe preferon që hoteli t’i shitet një blerësi nga Zvicra.
Hoteli përfshin një restorant të madh dhe ofron infrastrukturën e një objekti hotelier me tri yje. Çmimi i kërkuar për shitjen e tij është 2.5 milionë franga zvicerane.
Pas mbylljes së aktivitetit më 31 tetor, e ardhmja e këtij hoteli tradicional mbetet e hapur, ndërsa pronari vazhdon të kërkojë një blerës që do të marrë përsipër pronën./Albinfo.ch
