Qeveria e Maqedonisë së Veriut ka miratuar kornizën dhe draftmarrëveshjen me Bashkimin Evropian për përfshirjen e vendit në sistemin “Roaming si në shtëpi”, duke ndërmarrë një hap të ri drejt heqjes së tarifave shtesë të komunikimit gjatë udhëtimeve në vendet e BE-së, përcjell albinfo.ch.
Ky vendim synon t’u mundësojë qytetarëve të Maqedonisë së Veriut që, gjatë qëndrimit në vendet e Bashkimit Evropian, të përdorin telefonatat, mesazhet dhe internetin celular sipas kushteve të paketave të tyre vendore.
Përfitime pritet të kenë veçanërisht qytetarët që udhëtojnë shpesh drejt vendeve evropiane, studentët, bizneset dhe familjet që mbajnë lidhje të rregullta me diasporën.
Nisma është pjesë e përpjekjeve për zgjerimin e sistemit evropian të roamingut edhe në vendet e Ballkanit Perëndimor.
Në qershor të këtij viti, Bashkimi Evropian miratoi nisjen e negociatave për heqjen e tarifave të roamingut me gjashtë vendet e rajonit, përfshirë Maqedoninë e Veriut.
Ministri i Transformimit Digjital, Stefan Andonovski, kishte deklaruar më herët se vendi i kishte përfunduar përgatitjet kryesore ligjore dhe se synonte përfshirjen në këtë sistem gjatë vitit 2027.
Megjithatë, miratimi i draftmarrëveshjes nuk nënkupton heqjen e menjëhershme të tarifave. Për zbatimin e sistemit nevojitet përfundimi i procedurave përkatëse ndërmjet Maqedonisë së Veriut dhe Bashkimit Evropian
