Gjenerata e re e shqiptarëve në diasporë po dëshmon gjithnjë e më shumë se integrimi nuk nënkupton vetëm të qenët pjesë e shoqërisë ku jeton, por integrimi nënkupton marrjen e përgjegjësive dhe pjesëmarrjen aktive edhe në vendimmarrje. Të arsimuar, të afirmuar profesionalisht dhe me përvojë në shoqëritë evropiane, gjithnjë e më shumë shqiptarë po synojnë të jenë pjesë e institucioneve dhe proceseve politike.
Një prej tyre është Driton Idrizi, me origjinë nga Debreshi i Gostivarit, i cili kandidon për Këshillin e Qytetit të Lubjanës, në listën „Ljubljana smo vsi“ (Lubjana jemi të gjithë). Me një formim akademik në Universitetin e Lubjanës dhe përvojë profesionale në kompani vendore e ndërkombëtare, Idrizi synon që përvojën e tij ta vërë në shërbim të qytetit dhe qytetarëve të tij.
Në këtë intervistë për Albinfo.ch, ai flet për rrugëtimin e tij jetësorë e profesional, motivet e hyrjes në politikë, prioritetet e programit zgjedhor, si dhe për nevojën një përfaqësimi më të madh të shqiptarëve në institucionet e Sllovenisë.
Albinfo.ch: Na flisni pak për veten tuaj, shkollimin, formimin profesional dhe rrugëtimin tuaj jetësor?
Driton Idrizi: Përshëndetje! Së pari, dëshiroj t ju falënderoj dhe t`ju përgëzoj për punën që bëni. Albinfo.ch ka qenë dhe vazhdon të jetë një media që gjithmonë ka promovuar dhe mbështetur arritjet e shqiptarëve anembanë botës.
Jam Driton Idrizi, me origjinë nga fshati Debresh i Gostivarit. Rrugëtimi im në Slloveni filloi në vitin 2011, kur pas përfundimit të studimeve bachelor, u pranova në programin prestigjioz ndërkombëtar të studimeve master, International Master in Business and Organisation (IMB), në Fakultetin Ekonomik të Universitetit të Lubjanës.
Ky program sot renditet në vendin e 29-të në botë, sipas klasifikimit të Financial Times për vitin 2026, dhe prej nëntë vitesh radhazi është pjesë e 100programeve më të mira të masterit në menaxhim në nivel botëror.
Pas përfundimit të studimeve master, dëshira ime ishte që formimin tim akademik ta zbatoja në praktikë, në sektorin privat, konkretisht në fushën e marketingut. Gjatë karrierës sime kam punuar në kompani të njohura sllovene dhe ndërkombëtare, përfshirë kompaninë Iskra, ku kam udhëhequr departamentin e marketingut.
Aktualisht jam menaxher i marketingut në kompaninë ndërkombëtare UNIMOTION, ku merrem me zhvillimin e strategjive të marketingut dhe zgjerimin e pranisë së kompanisë në tregjet ndërkombëtare. Përveç angazhimit profesional, prej shumë vitesh jam aktiv edhe në jetën shoqërore, duke kontribuar në iniciativa të ndryshme për integrimin, bashkëpunimin dhe mbështetjen e komuniteteve. Jam bashkëshort dhe baba i dy fëmijëve.
Lubjana është qyteti ku kam ndërtuar karrierën dhe familjen time dhe ku po rriten fëmijët e mi. Prandaj, zhvillimi dhe e ardhmja e këtij qyteti kanë një rëndësi të veçantë për mua.
Albinfo.ch: Si lindi interesimi juaj për politikën dhe çfarë ju shtyu të hyni në këtë rrugë dhe të kandidoni për Këshillin e Qytetit të Lubjanës?
Driton Idrizi: Interesimi im për çështjet shoqërore dhe publike ka ekzistuar prej shumë vitesh. Përmes punës profesionale dhe angazhimit në aktivitete të ndryshme shoqërore, kam pasur mundësinë të njoh nga afër sfidat me të cilat përballen qytetarët. Konkretisht, vendimi për kandidaturën time erdhi pas një propozimi nga ish-kryeministri i Sllovenisë, dr. Anton Rop, për të iu bashkuar ekipit të tij në këtë rrugëtim.
Në fillim isha pak skeptik, sepse kjo pune kërkon përgjegjësi dhe përkushtim, por duke parë vizionin dhe besimin e dr. Anton Rop dhe atë të ish-kryetares së Parlamentit të Sllovenisë, mg. Urška Klakočar Zupančič, jam i sigurt se kam marrë vendimin e duhur.
Vërtet, është privilegj dhe krenari për mua, si shqiptar, të kandidoj për këshilltar në Këshillin e Qytetit të Lubjanës, sepse gjithmonë kam besuar se nuk duhet të mbetemi në pozitën e vëzhguesve dhe komentuesve për çështjet që kanë të bëjnë me vendin ku jetojmë, por duhet të jemi të gatshëm të marrim përgjegjësi dhe të kontribuojmë në zgjidhjen e tyre. Për mua, politika nuk është qëllim në vetvete, por një mundësi për të kontribuar pikërisht në atë që përmenda më sipër.
Albinfo.ch: A shpresoni në përkrahjen e bashkëkombësve shqiptarë që jetojnë në Lubjanë dhe sa mund të ndikojë vota shqiptare në rezultatin e kandidaturës suaj?
Driton Idrizi: Natyrisht që përkrahja e bashkëkombësve të mi që jetojnë në Lubjanë ka një rëndësi të veçantë për mua. Shqiptarët janë pjesë e rëndësishme e shoqërisë këtu. Ata kontribuojnë në jetën ekonomike, kulturore dhe shoqërore të qytetit. Prandaj, është e natyrshme që edhe zëri i tyre të jetë i pranishëm në vendimmarrjen lokale. Besoj se çdo votë ka rëndësinë e vet dhe se pjesëmarrja e qytetarëve shqiptarë mund të japë një kontribut të rëndësishëm në rezultatin e kandidaturës sime.
Ajo që më gëzon më shumë është entuziazmi dhe interesimi që po shohim. Por, mbi të gjitha, është e rëndësishme që të gjithë qytetarët me të drejtë vote të marrin pjesë në procesin demokratik dhe të vendosin sipas bindjeve të tyre. Besoj se pikërisht në këtë mënyrë mund të arrihen ndryshime pozitive dhe zëri ynë të dëgjohet më shumë në institucionet lokale.
Albinfo.ch: Cila është motoja apo slogani me të cilin garoni në këto zgjedhje dhe cili është mesazhi kryesor që dëshironi tju përcillni qytetarëve?
Driton Idrizi: Motoja me të cilën garojmë në këto zgjedhje është „Ljubljana smo vsi“ – „Lubjana jemi të gjithë“. Kjo moto përfaqëson edhe bindjet e mia personale: një qytet u përket të gjithë atyre që jetojnë në të, pa dallim prejardhjeje, kombësie, moshe apo përkatësie fetare e kulturore.
Lubjana është një qytet i hapur dhe i larmishëm, ku jetojnë njerëz me prejardhje, kultura, fe dhe përvoja të ndryshme. Secili prej tyre kontribuon në zhvillimin dhe identitetin e qytetit. Mesazhi im kryesor për qytetarët është: Ndihuni të përfshirë, të respektuar dhe të dëgjuar! Kërkoni mundësi të barabarta për të gjithë, shprehni nevojat dhe idetë tuaja dhe bëhuni pjesë aktive e vendimmarrjes. Sepse një qytet zhvillohet atëherë kur dëgjon qytetarët e tij dhe kur idetë e tyre shndërrohen në iniciativa konkrete. Kontribuoni edhe ju për një qytet më të mirë, sepse Lubjana është e të gjithëve!
Albinfo.ch: Cilat janë tri premtimet apo prioritetet kryesore të programit tuaj zgjedhor, me të cilat synoni të fitoni besimin e qytetarëve?
Driton Idrizi: Programi ynë përfshin disa fusha të rëndësishme. Unë do të veçoja këto tre prioritete kryesore, të cilat i konsideroj thelbësore dhe që ndikojnë drejtpërdrejt në jetën e përditshme të qytetarëve të Lubjanës:
- Banim i përballueshëm për të gjithë
Ky është një nga problemet më të mëdha të Lubjanës, pra vështirësia për të siguruar një banesë, veçanërisht për të rinjtë dhe familjet e reja është në rend të parë. Sipas të dhënave të prezantuara nga Anton Rop, gjatë njëzet viteve të fundit janë ndërtuar më pak se 1.500 banesa jofitimprurëse, ndërkohë që numri i banorëve është rritur për rreth 36.000. Për këtë arsye, programi ynë parasheh ndërtimin e mbi 1.500 banesave publike dhe 2.000 dhomave studentore brenda dy viteve. Qëllimi është që të rinjtë të mos detyrohen të largohen nga Lubjana për shkak të çmimeve të papërballueshme të banimit.
- Transport publik më efikas
Trafiku është një problem tjetër. që ndikon drejtpërdrejt në kohën dhe cilësinë e jetës së qytetarëve.
Ljubljana përballet çdo ditë edhe me fluksin e madh të automjeteve nga komunat përreth. Ne synojmë përmirësimin e linjave dhe shpeshtësisë së autobusëve, veçanërisht në lagjet më të largëta, lidhjen më të mirë të qytetit me rajonin përreth dhe studimin e mundësisë së rikthimit të transportit me tramvaj. Një masë konkrete është edhe transporti publik falas deri në Qendrën Klinike Universitare (UKC), për të lehtësuar qasjen e pacientëve dhe vizitorëve.
- Zgjidhja e problemit të parkimit në lagjet e banimit
Parkimi është një nga shqetësimet më të mëdha të përditshme të banorëve. Nuk është e pranueshme që njerëzit, pas një dite pune, të kalojnë një kohë të gjatë duke kërkuar vend parkimi pranë shtëpisë së tyre. Programi ynë parasheh krijimin e 5.000 vendeve të reja në garazhe dhe rregullimin e sistemit të parkimit në 17 lagje të Lubjanës. Sipas vlerësimeve të paraqitura nga dr. Anton Rop, në lagjet e banimit përreth qendrës së Lubjanës mungojnë rreth 4.000 deri në 7.000 vende parkimi.
Albinfo.ch: Pse vendosët të kandidoni në listën zgjedhore „Ljubljana smo vsi“? Çfarë ju bashkon me këtë subjekt politik dhe çfarë ju dallon nga kandidatët e tjerë?
Driton Idrizi: Vendimi im për të kandiduar në listën „Ljubljana smo vsi” nuk lidhet vetëm me përvojën dhe vizionin e njerëzve që qëndrojnë pas saj, por mbi të gjitha me vlerat dhe qasjen që kjo listë përfaqëson. Më pëlqen ideja e një politike më të hapur, më transparente dhe më të afërt me qytetarët, ku vendimet nuk merren vetëm në zyrat e institucioneve, por ku dëgjohen edhe nevojat dhe propozimet e njerëzve që jetojnë çdo ditë në këtë qytet.
Një arsye tjetër e rëndësishme është se kjo listë ofron mundësinë që në jetën politike të përfshihen njerëz me përvoja të ndryshme profesionale dhe jetësore, të cilët vijnë nga jashtë politikës tradicionale dhe mund të sjellin ide dhe mënyra të reja të të menduarit. Me listën „Ljubljana smo vsi” më bashkojnë vlerat e transparencës, përgjegjësisë, barazisë dhe përfshirjes së të gjithë qytetarëve, pa dallim prejardhjeje apo përkatësie. Për mua është veçanërisht e rëndësishme që çdo banor i Lubjanës të ndihet pjesë e qytetit dhe të ketë mundësi të barabarta për të kontribuar në zhvillimin e tij. Ajo që më dallon është përvoja ime në sektorin privat dhe puna në kompani ndërkombëtare, ku kam fituar njohuri në menaxhim, organizim dhe komunikim. Gjithashtu, si pjesë e komunitetit shqiptar dhe si dikush që ka studiuar, punuar dhe krijuar familje në Lubjanë, kam pasur mundësinë të njoh njerëz me prejardhje të ndryshme dhe të kuptoj më mirë problemet dhe nevojat e tyre.
Këtë përvojë, si profesionale ashtu edhe personale, dëshiroj ta sjell në Këshillin e Qytetit. Besoj se politika lokale duhet të merret me problemet e përditshme të qytetarëve dhe të ofrojë zgjidhje konkrete.
Albinfo.ch: Si e vlerësoni përfaqësimin e shqiptarëve në politikën dhe institucionet e Sllovenisë, a është ky përfaqësim i kënaqshëm apo mendoni se shqiptarët meritojnë më shumë hapësirë dhe zë në vendimmarrje?
Driton Idrizi: Shqiptarët në Slloveni kanë arritur shumë në fusha të ndryshme. Ata kontribuojnë në ekonomi, në biznes, në ndërtimtari, në shërbime, në kulturë dhe në shumë fusha të tjera të jetës shoqërore. Megjithatë, ky kontribut nuk përkthehet ende në një përfaqësim të denjë në institucionet ku merren vendimet. Unë besoj se shqiptarët meritojnë më shumë hapësirë dhe zë në vendimmarrje. Kjo nuk duhet të shihet si kërkesë për privilegje, por si kërkesë për mundësi të barabarta, përfaqësim demokratik dhe vlerësim të kontributit të tyre në shoqërinë sllovene. Si kandidat për këshilltar në Këshillin e Qytetit të Lubjanës, dëshiroj të jem një zë aktiv për të gjithë qytetarët, përfshirë edhe komunitetin shqiptar. Mendoj se është e rëndësishme që shqiptarët të jenë më të pranishëm në këshillat komunalë, në institucionet publike dhe në proceset e vendimmarrjes. Në fund, integrimi i vërtetë nuk nënkupton vetëm të jetosh dhe të punosh në një vend, por edhe të kesh mundësi të marrësh pjesë në vendimet që ndikojnë në të ardhmen e tij.
Albinfo.ch: Nëse kërkoni edhe votën e qytetarëve shqiptarë, çfarë zotoheni konkretisht se do të bëni për komunitetin shqiptar në Slloveni?
Driton Idrizi: Së pari, dua të theksoj se nëse zgjidhem anëtar i Këshillit të Qytetit të Lubjanës, përgjegjësia ime do të jetë ndaj të gjithë qytetarëve, pavarësisht kombësisë, prejardhjes apo përkatësisë së tyre. Si pjesë e komunitetit shqiptar, natyrisht që i njoh nga afër edhe sfidat me të cilat përballen bashkëkombësit tanë. Do të angazhohem për komunikim më të mirë mes qytetarëve dhe institucioneve komunale, për mbështetjen e bizneseve të vogla dhe për krijimin e më shumë mundësive për të rinjtë në sport, kulturë dhe aktivitete të tjera.
Për mua është e rëndësishme që çdo qytetar të ketë mundësi të dëgjohet dhe që shqetësimet e tij të trajtohen me seriozitet. Do të jem i hapur për komunikim, do ti dëgjoj problemet e qytetarëve dhe do të angazhohem që ato të përcillen dhe të trajtohen nga institucionet përgjegjëse.
Albinfo.ch: Dhe për fund, cili do të ishte mesazhi juaj për shqiptarët që jetojnë në Slloveni?
Driton Idrizi: Shqiptarët që jetojnë në Ljubljanë dhe në mbarë Slloveninë duhet të jenë krenarë për prejardhjen, gjuhën dhe identitetin e tyre dhe njëkohësisht të ndihen pjesë e barabartë e shoqërisë sllovene. Personalisht, jam krenar për origjinën time shqiptare, ashtu siç jam krenar për rrugëtimin dhe jetën që kam ndërtuar në Slloveni.
Shqiptarët kanë punuar shumë, kanë krijuar familje, kanë hapur biznese dhe kanë dhënë kontribut të rëndësishëm në zhvillimin e vendit. Ky kontribut meriton respekt dhe vlerësim. Prandaj i inkurajoj të jenë më aktivë në jetën shoqërore dhe institucionale dhe të marrin pjesë në vendimet që ndikojnë në të ardhmen e tyre.
Mesazhi im për të rinjtë shqiptarë është ky: besoni në veten tuaj, investoni në arsim dhe punoni për ëndrrat dhe qëllimet tuaja. Rruga drejt suksesit nuk është gjithmonë e lehtë. Përkundrazi, shpesh është e mbushur me sfida, sprova, sakrifica dhe net pa gjumë. Është një rrugë nëpër të cilën kam kaluar dhe vazhdoj të kaloj edhe unë, së bashku me familjen time, çdo ditë. Por, me punë, përkushtim dhe këmbëngulje, çdo pengesë mund të tejkalohet kur beson në veten tënde. Mos lejoni që vështirësitë tju kufizojnë. Ruajeni identitetin tuaj dhe ecni përpara me krenari!
Në fund, apeloj tek të gjithë qytetarët me të drejtë vote të dalin në zgjedhjet lokale më 15 nëntor dhe ta shfrytëzojnë të drejtën e tyre për të vendosur për të ardhmen e Lubjanës.
Unë kandidoj në listën “Ljubljana smo vsi”, me numrin 3, ndërsa numri im për votën preferenciale është 10.
