“Patëm kënaqësinë e veçantë të mirëpresim në Ambasadën e Republikës së Kosovës në Stokholm operatorët turistikë nga Kosova, së bashku me përfaqësues të projektit GROW dhe Ministrisë së Turizmit, me rastin e pjesëmarrjes së Kosovës në Travel News Market 2026”, thuhet në një njoftim nga ambasada kosovare në Suedi.
Në takim ishin të pranishme edhe Lumturie Geci, përfaqësuese e Ministrisë së Turizmit, Shega Shkodra, përfaqësuese e projektit GROW të Swiss Contact, si dhe Florenda Govori, CEO e Nordic Chamber of Commerce,
Takimi shërbeu si një mundësi për të diskutuar potencialin turistik të Kosovës në tregun suedez dhe atë nordik, si dhe për të avancuar bashkëpunimin ndërmjet institucioneve, organizatave mbështetëse dhe operatorëve turistikë. Përfaqësuesja e Ministrisë së Turizmit prezantoi objektivat dhe prioritetet e Ministrisë, duke rikonfirmuar gatishmërinë për të mbështetur iniciativa të përbashkëta.
Më 12 nëntor, Kosova mori pjesë për të tretin vit radhazi në Travel News Market, një nga ngjarjet kryesore profesionale të industrisë së turizmit në Suedi. Edicioni i këtij viti shënoi numër rekord të ekspozuesve dhe mbi 3,000 takime të paraplanifikuara, duke krijuar mundësi të rëndësishme për kontakte dhe bashkëpunime të reja.
Kosova u përfaqësua nga dhjetë kompani turistike, të cilat prezantuan ofertën e vendit në fushën e turizmit kulturor, urban, malor dhe të aventurës.
Gjatë panairit, Ambasadorja Shkendije Geci-Sherifi hapi prezantimin e ofertës turistike të Kosovës për publikun suedez, ndërsa alpinistja me renome botërore, Uta Ibrahimi prezantoi potencialin e vendit në turizmin malor dhe të aventurës. Ambasadorja gjithashtu dha një intervistë për Travel News Market, ku foli për potencialin turistik të Kosovës dhe pse Kosova mund të jetë një destinacion atraktiv për turistët suedezë e nordikë.
Një element kreativ i promovimit ishte edhe vendosja e mbishkrimit “VISIT KOSOVO” në varëset e kartelave identifikuese të të gjithë pjesëmarrësve nga vende të ndryshme të botës, duke i dhënë Kosovës vizibilitet gjatë gjithë ngjarjes.
Pjesëmarrja e Kosovës realizohet në kuadër të projektit GROW të Swisscontact, me mbështetjen e Sida-s dhe Ministrisë së Turizmit të Republikës së Kosovës në koordinim me Ambasadën e Kosovës në Stokholm, thuhet në fund të njoftimit të Ambsadës së Republikües së Kosovës në Stokholm.
