Presidentja e Republikës së Kosovës, Justina Shiroka Pula, ka pritur në takim ambasadorin e Austrisë në Kosovë, Georg Schnetzer, me të cilin ka diskutuar për marrëdhëniet dypalëshe dhe mundësitë për zgjerimin e bashkëpunimit ndërmjet dy vendeve, njofton albinfo.at.
Gjatë takimit u rikonfirmua përkushtimi i përbashkët për forcimin e bashkëpunimit politik, ekonomik dhe institucional, si dhe për nxitjen e investimeve austriake në Kosovë.
Presidentja Shiroka Pula shprehu mirënjohjen për angazhimin dhe kontributin e Austrisë në thellimin e marrëdhënieve ndërmjet dy vendeve, duke theksuar rëndësinë e investimeve të drejtpërdrejta austriake për zhvillimin e ekonomisë së Kosovës.
Ajo vlerësoi se ekziston potencial i konsiderueshëm për intensifikimin e mëtejshëm të bashkëpunimit ekonomik dhe tregtar, ndërsa shprehu bindjen se marrëdhëniet e bazuara në miqësi të qëndrueshme dhe besim të ndërsjellë do të vazhdojnë të forcohen.
Në fokus të diskutimeve ishte edhe mbështetja e Austrisë për rrugëtimin evropian të Kosovës. Ambasadori Schnetzer rikonfirmoi përkushtimin e vendit të tij për thellimin e mëtejshëm të partneritetit dhe miqësisë ndërmjet dy shteteve.
Bashkëpunimi politik, ekonomik dhe institucional mbetet një nga fushat kryesore të marrëdhënieve ndërmjet Kosovës dhe Austrisë./Albinfo.at
