Shqipëria përballet sonte, më 15 nëntor, me Bjellorusinë në ndeshjen e fundit të Grupit C1 të Ligës së Kombeve. Takimi zhvillohet në stadiumin “Illovszky Rudolf” në Budapest, duke filluar nga ora 18:00, përcjell albinfo.ch.
Kuqezinjve u mjafton edhe një barazim për ta siguruar vendin e parë dhe ngjitjen direkte në Ligën B.
Në konferencën për media të mbajtur të shtunën, së bashku me mesfushorin Kristjan Asllani, trajneri Rolando Maran theksoi se skuadra do të përqendrohet te loja e saj dhe te arritja e objektivit.
Sipas njoftimit të FSHF-së, Maran e cilësoi Bjellorusinë si një nga kundërshtarët që i ka krijuar më shumë vështirësi Shqipërisë në këtë grup. Ai vuri në dukje se bjellorusët kishin pësuar vetëm një humbje në 12 ndeshjet e fundit, pikërisht ndaj kuqezinjve.
Trajneri shprehu besim te grupi dhe te gatishmëria e lojtarëve për të dhënë maksimumin. Për mungesën e Ylber Ramadanit, ai theksoi se futbollistët e tjerë kanë cilësitë për ta zëvendësuar dhe për të kontribuar në këtë përballje vendimtare./Albinfo.ch
