Irani ka refuzuar kërkesën e Gjermanisë për ndalimin e pasurimit të uraniumit. Zëdhënësi i Ministrisë së Jashtme iraniane, Esmail Baghaei, deklaroi të dielën se Teherani e konsideron këtë një të drejtë që buron nga anëtarësimi në Traktatin për Mospërhapjen e Armëve Bërthamore, përcjell albinfo.ch.
Sipas tij, e drejta për pasurimin e uraniumit nuk i është dhënë Iranit nga Gjermania, Franca apo shtetet e tjera.
Baghaei kritikoi gjithashtu Agjencinë Ndërkombëtare për Energjinë Atomike, duke kundërshtuar bazën teknike të vlerësimeve të saj për një objekt të mundshëm të ri pasurimi në Isfahan.
Ai tha se lufta me Shtetet e Bashkuara dhe Izraelin kishte ndërprerë qasjen e inspektorëve në objektet bërthamore iraniane. Megjithatë, këmbënguli se Irani nuk i kishte pezulluar detyrimet e mbikëqyrjes bërthamore.
Në lidhje me sulme të tjera të mundshme amerikane, zëdhënësi paralajmëroi se Teherani do të kundërpërgjigjej./Albinfo.ch
