Skip to content

Kërkesat për azil në Zvicër bien me 16 për qind gjatë tetorit

Autoritetet regjistruan 2.210 kërkesa për azil në tetor, 433 më pak se një vit më parë. Afganistani mbetet vendi kryesor i origjinës së aplikuesve.

Në Zvicër janë regjistruar 2.210 kërkesa për azil gjatë tetorit 2026, që përbën një rënie prej 16 për qind krahasuar me të njëjtin muaj të vitit të kaluar, përcjell albinfo.ch.

Sipas të dhënave të publikuara më 16 nëntor nga Sekretariati Shtetëror për Migracionin (SEM), numri i kërkesave ishte 433 më i ulët se në tetor 2025.

Afganistani mbetet vendi kryesor i origjinës së aplikuesve, me 498 kërkesa. Pas tij renditen Eritrea me 430, Algjeria me 236, Etiopia me 171 dhe Somalia me 163 kërkesa.

Megjithatë, krahasuar me shtatorin 2026, numri i aplikimeve u rrit me 4 për qind. SEM sqaron se kërkesat zakonisht shtohen në fund të verës dhe gjatë vjeshtës, ndërsa bien në muajt e dimrit.

Gjatë tetorit, SEM mori vendime në shkallë të parë për 2.419 kërkesa dhe u dha azil 567 personave.

Po atë muaj, 732 persona u larguan nga Zvicra nën mbikëqyrjen e autoriteteve. Prej tyre, 418 u larguan vetë, ndërsa 314 u kthyen me shoqërim policor në vendet e origjinës, në shtete të treta ose në shtetin përgjegjës sipas sistemit të Dublinit./Albinfo.ch