Policia Federale gjermane ka arrestuar një shtetas shqiptar 31-vjeçar në qytetin e Aachenit, nën dyshimin për vjedhje dhe disa vepra të tjera penale. Gjatë verifikimit të identitetit, autoritetet zbuluan se ai ishte i njohur për policinë gjermane dhe se ndaj tij ishin regjistruar disa kërkesa për kërkim dhe lokalizim, njofton albinfo.ch.
Ngjarja ndodhi të dielën, rreth orës 11:00, në stacionin qendror të trenit në Aachen. Policia ishte njoftuar për një rast të dyshuar vjedhjeje në një dyqan që shet produkte kozmetike dhe higjienike.
Sipas njoftimit të policisë, punonjësit e dyqanit kishin ndaluar një 29-vjeçare nga Bullgaria, e cila dyshohej se, së bashku me një burrë, kishte tentuar të vidhte produkte në vlerë prej rreth 28 eurosh.
Burri i dyshuar ishte larguar para mbërritjes së policisë. Megjithatë, gjatë kontrollit të zonës, zyrtarët policorë vunë re një person pranë një parkingu shumëkatësh, i cili u përpoq të largohej me vrap sapo vërejti policinë.
Pas ndjekjes, efektivët arritën ta ndalonin në njërin prej kateve të parkingut. Pranë tij u gjetën edhe produktet që dyshohet se ishin marrë nga dyqani.
Gjatë shoqërimit në stacionin policor, 31-vjeçari kundërshtoi arrestimin dhe përdori forcë fizike ndaj zyrtarëve. Megjithatë, policët arritën ta neutralizonin dhe ta prangosnin.
Shtatë identitete të tjera dhe dhjetë kërkesa për lokalizim
Verifikimet e mëtejshme zbuluan se shqiptari kishte një histori të gjatë me autoritetet gjermane. Në sistemin policor figuronin shtatë identitete të tjera të lidhura me të, si dhe dhjetë kërkesa për përcaktimin e vendndodhjes, të lëshuara nga Prokuroria e Bremenit.
Këto kërkesa lidheshin me dyshime për vepra të ndryshme penale, ndër të cilat vjedhje, grabitje, kanosje, plagosje të rëndë dhe detyrim seksual.
Gjithashtu, policia konstatoi se 31-vjeçari ishte dëbuar nga Gjermania në vitin 2023. Në atë kohë, ndaj tij ishte vendosur edhe ndalimi i hyrjes dhe qëndrimit në territorin gjerman për një periudhë pesëvjeçare.
Gjatë kontrollit personal, policët i gjetën një thikë në çantë. Për këtë arsye, ndaj tij u ngrit edhe dyshimi për vjedhje me armë.
Pas konsultimit me Prokurorinë, shqiptari u dërgua në ambientet e ndalimit policor në Aachen, me qëllim që të paraqitej para gjykatës për shqyrtimin e masës së paraburgimit./Albinfo.ch