Skip to content

Dy të rinj shqiptarë humbin jetën në një aksident në Gjermani

Foto nga arkiva

Përplasja e nëntë automjeteve ndodhi të dielën në rrugën B311, pranë qytetit Erbach. Dy të rinjtë nga Rahoveci humbën jetën në vendngjarje, ndërsa viktima e tretë ndërroi jetë në spital.

Një aksident i rëndë trafiku në Gjermani u ka marrë jetën tre personave, mes tyre edhe dy të rinjve shqiptarë nga Kosova, me prejardhje nga komuna e Rahovecit. Ngjarja tragjike ndodhi pasditen e së dielës, më 15 nëntor 2026, në rrugën B311, pranë qytetit Erbach, në qarkun Alb-Donau, raporton albinfo.ch.

Sipas informacioneve të policisë gjermane, në aksident u përfshinë nëntë automjete, pas një përplasjeje fillestare ballore mes dy makinave. Dy drejtuesit e automjeteve, 18 dhe 19 vjeç, humbën jetën në vendngjarje, ndërsa një pasagjer 26-vjeçar, i cili ishte dërguar në spital në gjendje kritike, ndërroi jetë disa orë më vonë.

Dy viktimat nga Kosova janë identifikuar si L.M. dhe B.Z., të cilët jetonin në Gjermani.

Në automjetin tjetër ndodheshin edhe dy persona të moshës 26-vjeçare, të cilët pësuan lëndime shumë të rënda. Ndërkohë, tre persona të tjerë mbetën të plagosur. Deri më tani nuk ka informacione të plota zyrtare për gjendjen shëndetësore të të gjithë të lënduarve.

Dyshimet e para për shkakun e aksidentit

Sipas hetimeve paraprake, dyshohet se drejtuesi 18-vjeçar humbi kontrollin e automjetit gjatë një manovre parakalimi, teksa po lëvizte me shpejtësi të lartë në segmentin rrugor ndërmjet Dellmensingenit dhe Donauriedenit, shkruan tutje albinfo.ch.

Automjeti doli nga kontrolli, u përplas me makina të tjera dhe më pas goditi ballazi një automjet që po vinte nga drejtimi i kundërt.

Përplasja ishte jashtëzakonisht e fuqishme, ndërsa automjeti i dyshuar si shkaktar i aksidentit u nda në disa pjesë. Në operacionin e shpëtimit u angazhuan forca të shumta policore dhe emergjencash, përfshirë edhe shërbimet e mbështetjes psikologjike.

Për shkak të aksidentit, rruga B311, ndërmjet Dellmensingenit dhe Donauriedenit, mbeti e bllokuar për më shumë se 20 orë.

Rrethanat e plota të aksidentit janë duke u hetuar nga autoritetet gjermane./Albinfo.ch