Një gazetar hidhet nga katet e larta të ndërtesës së RTK-së

Ngjarja ka ndodhur në orët e mbrëmjes, ndërsa i vdekuri është gazetari i RTK-radios, Emin Rexhepi 39 vjeç

Emin Rexhepi 39 vjeç, gazetar i Radio Kosovës është hedhur nga katet e larta të objektit të RTK-radios dhe ka vdekur në vend. Ngjarja ka ndodhur në orët e mbrëmjes, ndërsa deri më tani nuk dihen motivet që kanë çuar gazetarin dhe redaktorin e muzikës rok, në vdekje. Policia apriori këtë e vlerëson si vdekje të dyshimtë.

Menaxhmenti dhe Bordi i RTK-së e morën me pikëllim të thellë lajmin për vdekjen e punëtorit të Radios, Emin Rexhepit. Emini, sipas tyre, ishte një punëtorë i zellshëm, djalë i qetë, komunikativ dhe i shoqërueshëm.

“Kjo është një humbje e madhe për Radio Televizionin e Kosovës. Menaxhmenti dhe Bordi i RTK-së i shpreh ngushëllime të sinqerta familjes së të ndjerit, ndërsa nga organet kompetente kërkon që të zbardhin në detaje vdekjen e tij”, thuhet në kumtesën lëshuar nga menaxhementi i RTK-së.

I menjëhershëm ka qenë edhe reagimi i Asociacionit të Gazetarëve të Kosovës. AGK përmes një njoftimi ka shprehur ngushëllime familjes e farefisit të të ndjerit Rexhepi si dhe komunitetit të gazetarëve për humbjen e jetës së kolegut të tyre.

AGK konsideron se kjo është një humbje për gazetarinë dhe se dëgjuesve do t’ju mungojë një zë i cili i ka shoqëruar në emisione të ndryshme në radio. AGK kërkon nga policia dhe organet e drejtësisë ndriçimin e rrethanave që çuan në vdekjen tragjike të 39 vjeçarit, i cili la pas vetes gruan dhe dy fëmijë.

“I ndjeri Emin Rexhepi, gjithmonë do të kujtohet si punëtor i zellshëm dhe i urtë. Qoftë i përjetshëm kujtimi për të”, thuhet në një komunikatë për media.

Vdekjen e gazetarit Emini e ka konfirmuar edhe Policia e Kosovës, por nuk ka dhënë shumë detaje. Zëdhënësja e Policisë për rajonin e Prishtinës, Flora Ahmeti tha se rreth orës 17:00 kanë marr një informatë për një vdekje të dyshimtë në rrugën “George Bush”, më saktësisht te ndërtesa e Radio Kosovës.

“Ajo që dimë deri me tani është se i vdekuri është i gjinisë mashkull i lindur në vitin 1976 i nacionalitetit shqiptar. Për detaje tjera, ne i presim rezultatet e mjekësisë ligjore”, tha ajo.