Fondi pensional federal i Zvicrës, Publica, ka njoftuar se do të zhvillojë një hetim të pavarur të jashtëm pas sulmit kibernetik, gjatë të cilit janë vjedhur të dhëna nga një prej kompanive të tij furnizuese të shërbimeve softuerike.
Sipas njoftimit të Publica-s, hetimi do të përqendrohet në përgjegjësitë e vetë fondit, proceset e brendshme dhe masat e sigurisë. Qëllimi është të identifikohen dobësitë e mundshme në sistem dhe të propozohen masa konkrete për përmirësimin e sigurisë. Në rast se evidentohen rreziqe të reja, fondi ka paralajmëruar se do të ndërmarrë menjëherë masa për t’i parandaluar ato.
Hetimi do të zhvillohet nga një kompani e jashtme, e cila ende duhet të përzgjidhet përmes procedurës së tenderimit. Rezultatet e para pritet të publikohen deri në mars të vitit 2027.
Ndërkohë, hetimet penale dhe shqyrtimet nga Komisioneri Federal për Mbrojtjen e të Dhënave dhe Informacionit janë tashmë në zhvillim. Ato lidhen kryesisht me kompaninë e teknologjisë informative PK Softtech, ofruesja e softuerit që përdoret nga Publica.
Pavarësisht hetimit të jashtëm, analizat teknike do të vazhdojnë me prioritetin më të lartë, ka bërë të ditur fondi. Sipas informacioneve aktuale, ende nuk është përcaktuar përfundimisht se cilat të dhëna personale janë komprometuar.
Publica e kishte bërë publik incidentin e sigurisë së të dhënave në fillim të tetorit. Sipas raportimeve të mediave të ndryshme, bëhet fjalë për një sasi shumë të madhe të dhënash, përfshirë emrat, mbiemrat, pagat dhe informacione të tjera të të gjithë personave të siguruar në fond, si të punësuarve aktivë, ashtu edhe pensionistëve. Në total, të dhënat mund të përfshijnë më shumë se 100 mijë persona, përfshirë edhe individë që aktualisht ose më parë kanë punuar në organizata të tjera shtetërore apo gjysmëpublike.
Sipas hulumtimit të transmetuesit publik zviceran SRF, autorët e sulmit kanë kërkuar shpërblim financiar në këmbim të mos publikimit të të dhënave. Ky informacion ende nuk është konfirmuar zyrtarisht.
Rasti ka shkaktuar shqetësim edhe në nivelet më të larta të qeverisë federale zvicerane. Shqetësimi kryesor lidhet me mundësinë që në duart e hakerëve të kenë përfunduar edhe të dhënat e personave që punojnë në shërbimet e sigurisë dhe inteligjencës. Zbulimi i identitetit të tyre mund të ketë pasoja serioze për sigurinë kombëtare të Zvicrës.