Policia paralajmëron për një skemë të re mashtrimi, përmes së cilës qytetarët mashtrohen që të tërheqin shuma të mëdha parash nga bankat dhe t’ua dorëzojnë personave që paraqiten rrejshëm si përfaqësues të Bankës Kombëtare të Zvicrës.
Policia për luftimin e krimeve kibernetike në Zvicër ka lëshuar një paralajmërim për një skemë të re mashtrimi, në të cilën persona të panjohur paraqiten si punonjës bankash dhe përmes telefonatave manipulojnë qytetarët, me qëllim që t’u marrin paratë.
Mashtruesit i telefonojnë viktimave duke u thënë se nga llogaritë e tyre bankare janë kryer transfere të paautorizuara. Më pas, telefonata përcillet te persona të tjerë, të cilët paraqiten si pjesëtarë të departamentit të sigurisë së bankës.
Ata pretendojnë se në bankë janë zbuluar raste të mashtrimit të brendshëm dhe se Banka Kombëtare e Zvicrës (SNB) do t’i kompensojë humbjet e mundshme. Megjithatë, sipas tyre, për këtë qëllim duhet të hapet një llogari e veçantë sigurie pranë kësaj banke.
Përdorin dokumente të falsifikuara për ta bërë mashtrimin më bindës
Për ta bërë skemën sa më të besueshme, mashtruesit dërgojnë edhe email-e të falsifikuara në emër të Bankës Kombëtare të Zvicrës. Këto mesazhe përmbajnë të dhënat personale të viktimave, një numër reference dhe informacione të rreme të kontaktit, duke krijuar përshtypjen se bëhet fjalë për një procedurë zyrtare.
Viktimave u thuhet se dokumentet për hapjen e llogarisë dhe kartelat bankare do t’u dërgohen me postë. Por, sipas policisë, kjo është vetëm një mënyrë për të fituar besimin e tyre.
Në vazhdim, mashtruesit pretendojnë se transferet e paautorizuara tashmë janë anuluar, por që për aktivizimin e llogarisë së supozuar të mbrojtur, viktimat duhet të tërheqin një shumë të konsiderueshme parash në dorë nga banka.
Paratë, sipas udhëzimeve të tyre, duhet t’u dorëzohen personave që paraqiten si përfaqësues të Bankës Kombëtare të Zvicrës. Dorëzimi shoqërohet edhe me dokumente të falsifikuara, ndërsa viktimat vihen nën presion të madh kohor, në mënyrë që të mos kenë mundësi të verifikojnë informacionet.
Në disa raste, mashtruesit i kontaktojnë viktimat sërish, duke përdorur identitete të tjera të rreme, përfshirë edhe paraqitjen si zyrtarë policorë. Megjithatë, qëllimi mbetet i njëjtë: marrja e parave të gatshme.
Si të mbroheni nga kjo skemë mashtrimi?
Policia këshillon qytetarët që:
– T’i përcjellin email-et e dyshimta te platforma Cybercrimepolice.ch.
– Të mos japin të dhëna personale apo bankare pa verifikuar paraprakisht identitetin e personit që i kontakton.
– Në rast dyshimi, ta ndërpresin telefonatën dhe të kontaktojnë drejtpërdrejt institucionin përkatës përmes numrit zyrtar të telefonit.
– Të mos tërheqin asnjëherë para në dorë si përgjigje ndaj kërkesave të bëra përmes telefonit.
– Email-et e dyshimta t’i fshijnë ose t’i zhvendosin në dosjen e postës së padëshiruar.
Personat që kanë rënë pre e këtij mashtrimi dhe kanë dorëzuar para, këshillohen të kontaktojnë menjëherë policinë kantonale dhe të raportojnë rastin.