Skip to content

Shoferët zgjedhin gjithnjë e më shumë vinjetën elektronike, ja sa kushton ajo për vitin 2027

Më shumë se gjysma e vinjetave të shitura janë digjitale. Vinjeta për vitin 2027 del në shitje më 1 dhjetor dhe kushton 40 franga.

Vinjeta elektronike është bërë për herë të parë zgjedhja më e shpeshtë e drejtuesve të automjeteve në Zvicër. Sipas Zyrës Federale për Doganat dhe Sigurinë Kufitare (BAZG), ajo përbën rreth 54 për qind të shitjeve për vitin 2026, krahasuar me 45 për qind një vit më parë, përcjell albinfo.ch.

Nga rreth 11 milionë vinjeta të shitura gjithsej, afërsisht 5.8 milionë janë elektronike. Kërkesa më e madhe vjen nga Zvicra, e ndjekur nga Gjermania.

Vinjeta digjitale lidhet me targën dhe nuk ka nevojë të ngjitet në xhamin e automjetit.

Ndërkohë, vinjeta për vitin 2027 do të jetë në shitje nga 1 dhjetori 2026. Të dyja format kushtojnë 40 franga, ndërsa versioni ngjitës do të jetë vjollcë.

Autoritetet rekomandojnë blerjen elektronike përmes faqes zyrtare e-vignette.ch, pa tarifa shtesë. Ato paralajmërojnë për mesazhe mashtruese që kërkojnë përditësimin e të dhënave personale ose pagesën e përsëritur të vinjetës./Albinfo.ch.