Në prag të festave të fundvitit, ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, u ka bërë thirrje qytetarëve që të zgjedhin produkte vendore për dhuratat e të dashurve të tyre, duke mbështetur kështu bizneset, familjet dhe ekonominë e Kosovës, përcjell albinfo.ch.
Përmes një postimi në faqen e saj, ministrja ka njoftuar se në Prishtinë është nënshkruar Memorandumi i Mirëkuptimit për fushatën “Dhuro Made in Kosova”, së bashku me Mërgim Cahanin nga Gjirafa, Qëndresa Pejën nga Foleja dhe Debatik Hoxhën nga ShopAz.
“Pas çdo produkti të prodhuar në Kosovë qëndron puna e një biznesi, mundi i një familjeje dhe një kontribut për ekonominë tonë”, ka shkruar Kusari-Lila.
Sipas saj, ky bashkëpunim u mundëson bizneseve vendore t’i listojnë, promovojnë dhe shesin produktet e tyre në këto platforma pa kosto shtesë, duke zgjeruar tregun dhe duke i bërë prodhimet e tyre më të qasshme për konsumatorët në Kosovë dhe diasporë.
Ministrja ka falënderuar platformat që i janë bashkuar fushatës, duke theksuar se përmes këtij angazhimi po u krijojnë bizneseve vendore mundësi të reja për të rritur shitjet dhe praninë e tyre online.
Ajo ka ftuar edhe platformat e tjera online në Kosovë t’i bashkohen nismës, ndërsa prodhuesit dhe bizneset e interesuara mund të kontaktojnë në adresën dhuro.mik@rks-gov.net për t’u bërë pjesë e saj.
“Dhuro cilësi. Dhuro zhvillim. Dhuro Made in Kosova”, ka përfunduar ministrja./Albinfo.ch