Skip to content

Më 22 Nëntor, të gjitha rrugët shpijnë në Manastir

Në 118-vjetorin e Kongresit të Manastirit, u përuruan punimet në Shtëpinë Muze të Alfabetit të Gjuhës Shqipe.

Sot, më 22 nëntor, janë përuruar punimet në Shtëpinë Muze të Alfabetit të Gjuhës Shqipe në Manastir, në kuadër të shënimit të 118-vjetorit të Kongresit të Manastirit, përcjell albinfo.ch.

Në përurim morën pjesë kryeministri i Shqipërisë, Edi Rama, zëvendëskryeministri i Maqedonisë së Veriut, Bekim Sali, dhe Afrim Gashi.

Sipas njoftimit të Gashit, institucionet e Shqipërisë kanë dhënë mbështetje për restaurimin dhe mirëmbajtjen e kësaj shtëpie me vlerë të veçantë historike për kombin shqiptar.

“Më 22 Nëntor, të gjitha rrugët shpijnë në Manastir, në vendin ku, 118 vjet më parë, shkronjat shqipe u bënë simbol i një ëndrre të madhe kombëtare”, shkroi Gashi në Facebook.

Ai shprehu mirënjohje për angazhimin e institucioneve të Shqipërisë dhe bëri thirrje për ruajtjen e kultivimin e gjuhës shqipe, duke e cilësuar atë si strumbullar të identitetit dhe urë të bashkimit.

Përurimi në Ditën e Alfabetit riktheu vëmendjen te rëndësia e kësaj trashëgimie historike dhe përgjegjësia për t’ua përcjellë gjuhën shqipe brezave të ardhshëm./Albinfo.ch