Shqipëri-Kosovë, më shumë se ndeshje futbolli

Futbollisti i Përfaqësueses së Kosovës, Mërgim Brahimi, është shprehur se shpreson që miqësorja ndaj Shqipërisë të premten të jetë festive.

“Besoj se do të jetë një ndeshje festive. Është takim special dhe sigurisht se të gjithë kemi emocione. Ne luajmë për Kosovën. Unë jam i fokusuar të luaj për Kosovën, e më pas do të shohim për të ardhmen time. Nëse shënoj, nuk do të festoj. Gjithsesi ne do të luajmë për fitore”, ka deklaruar Brahimi për albinfo.ch.

Ai shënoi dy gola për Kosovën në miqësoren ndaj Guinesë Ekuatoriale, duke u shpallur edhe futbollisti më i mirë i ndeshjes. Mesfushori i Grasshoppersit debutoi pikërisht ndaj Guinesë. Ai thotë se do të japin maksimumin.

“Ne jemi duke pritur me padurim këtë ndeshje. Besoj se do të jetë e bukur dhe ne do të japim maksimumin”, theksoi Brahimi.

Ai kishte luajtur një ndeshje edhe me Shqipërinë, derisa është paraqitur edhe për Zvicrën U-21.