5 vjet të platformës albinfo.ch

Platforma albinfo.ch ka mbushur pesë vite të punës së saj të frytshme. Sot ajo e shënon simbolikisht këtë jubile të vogël të një pune vëllimore dhe cilësore. Më shumë se si një portal lajmesh, si një emision televiziv apo si një revistë mujore, albinfo.ch për këto pesë vite është dëshmuar si një platformë gjithëpërfshirëse në shërbim të komunitetit shqiptar në Zvicër. Këtë e tregojnë edhe një numër i madh tryezash me tema preokupuese për shoqërinë zvicerane dhe që e prekin migracionin dhe komunitetin shqiptar, si një ndër më të mëdhenjtë në Zvicër. Si e tillë, platforma albinfo.ch ka luajtur dhe vazhdon të luajë rolin e urës lidhëse në mes të këtij komuniteti dhe shoqërisë zvicerane.

5 vite nuk janë mjaft për të bërë ndryshime thelbësore në pozitën e një komuniteti dhe as për të ndryshuar perceptimin për të në shoqërinë vendëse, por një pesëvjetor si ky, është një moment i duhur kur mund të ndalemi dhe të bëjmë bilance për të parë arritjet, realizimet po edhe vështirësitë, problemet e sfidat. Në secilin rast arritjet peshojnë mbi të tjerat. Për këtë kemi shumë dëshmi: albinfo.ch sot është një medium që citohet me të madhe në shtypin shqiptar dhe atë zviceran. Për temat që lidhen me diasporën, madje mund të quhet, burim i patejkalueshëm. Dhe kjo është vetëm njëra nga dëshmitë. Për të përmendur dhe radhitur të tjerat, nuk mjafton ky moment festiv.

albinfo.ch falenderon mbështetësit e saj, jo vetëm financiarë, pastaj lexuesit dhe miqtë tjerë ngado janë për besimin e ofruar. Sigurisht, pa përkrahjen dhe pëlqimin e të gjithë juve nuk do ta kishim një albinfo.ch të tillë çfarë e kemi.