A do të thyejë edhe tetori rekordin e temperaturave?

Pas një shtatori rekord, temperaturat relativisht të larta vazhdojnë edhe në tetor. A mund të parashikojmë tashmë një tetor rekord?

Meteorologu Roger Perret nga MetwoNews për Blick ka thënë se ky është shtatori më i ngrohtë që nga fillimi i matjeve, por i pyetur se a do të sjellë edhe tetori vlera rekord, ai tha se tashmë ka një fillim rekord.

“Ne patjetër kemi një fillim rekord deri në tetor. Dje ka pasur tashmë disa rekorde absolute të tetorit – këto mund të arrihen sërish në nivel lokal sot ose nesër”, tha ai, shkruan albinfo.ch.

Megjithatë, meteorologu ende nuk mund të japë një parashikim për një tetor rekord, pasi tha se nuk është ende e mundur të parashikohet përfundimisht se si do të jetë gjysma e dytë e muajit.

Me temperatura mbi 20 gradë, vlerat aktualisht janë mbi mesataren, ndërsa sipas ekspertit të motit, termometri zakonisht ngjitet maksimalisht në 17 deri në 18 gradë në këtë periudhë të vitit.

Ka një lajm të mirë për të gjithë ata që duan të freskohen në vjeshtë: një front i ftohtë do të arrijë në Zvicër të mërkurën mbrëma.

“Po ftohet dhe do të jetë vetëm rreth 18 gradë të mërkurën – në fakt një temperaturë normale për vjeshtën”, u shpreh ai.

Me frontin e ftohtë në mesjavë vjen edhe lagështia: ka shi të izoluar, por sidomos në male, ndërsa edhe nëse temperaturat ulen për një kohë të shkurtër, nuk është ftohtë për kohën e vitit.