A u tërhoq Sami Lushtaku nga kandidatura për kryetar të Skënderajt?

Raportohet se garës për kryetar do t'i hyjë Fadil Nura nga PDK-ja

Kandidati i Partisë Demokratike të Kosovës për Skënderaj, Sami Lushtaku, raportohet se është tërhequr nga gara për zgjedhjet lokale pas vendimit të fundit të Gjykatës Supreme, e cila ia vërtetoi dënimin e shqiptuar më parë nga Gjykata.

Erfan Smajli nga dega e PDK-së në Skenderaj ka thënë se KQZ-ja ka marrë vendim se Lushtaku s’mund të certifikohet dhe se tashmë nga PDK-ja është dërguar për certifikim kandidatura e Fadil Nurës.

“Po e sigurt është që kandidati është Fadil Nura. Në orën katër do ta dërgojmë aplikacionin. Është marrë vendimi nga KQZ që nuk i lejohet Sami Lushtaku kandidatura”, ka thënë Smajli për Kallxo.com, transmeton Albinfo.ch.
Ndërkohë i kontaktuar nga Express, Lushtaku ka mohuar të jetë tërhequr nga gara për të parin e Komunës, edhe pse nga dega që drejton janë deklaruar se tashmë i kanë filluar procedurat për zëvendësimin e tij me Fadil Nurën. I pyetur nëse është tërhequr nga gara, Lushtaku ka thënë shkurt “Jo”, derisa e ka ndalë telefonin me arsyetimin se është në një takim.

Dje gjatë ditës, Gjykata Supreme e Kosovës njoftoi se ia ka vërtetuar dënimin për arratisjen nga “Burgu i Dubravës”.

 

---