Abazoviq të mërkurën shpjegon pse Mali i Zi e mbështeti Kosovën në Këshillin e Evropës

Abazoviq

Komisioni për Marrëdhënie Ndërkombëtare i Kuvendit të Malit të Zi do të mbajë seancën ku do të kërkojë shpjegime nga kryeministri dhe koordinatori i Ministrisë së Punëve të Jashtme malazeze, Dritan Abazoviq, lidhur me vendimin që ky shtet të mbështesë aplikacionin e Kosovës për anëtarësimin në Këshillin e Evropës.

Siç raportojnë mediat malazeze, seanca do të mbahet të mërkurën.

Komiteti i Ministrave të Këshillit të Evropës më 24 prill ka filluar procedurën për pranimin e Kosovës në atë organizatë ndërkombëtare, për të cilën ka votuar edhe përfaqësuesi i Malit të Zi.

Për këtë kanë reaguar ashpër një pjesë e partive malazeze në pushtet, të cilat pretendojnë se janë shkelur procedurat, pasi sipas tyre, “kjo çështje nuk është diskutuar në mbledhjen e qeverisë malazeze”.

Një hap më tej bëri Komisioni Parlamentar për Marrëdhënie Ndërkombëtare në Malin e Zi, i cili njoftoi se do të kërkojë nga Qeveria malazeze një raport për arsyet dhe mënyrën e marrjes së vendimit për të mbështetur fillimin e procedurës për pranimin e Kosovës në Këshillin e Evropës.

Gjatë vizitës së tij të fundit në Kosovë, Abazoviq theksoi se Mali i Zi do të mbështesë integrimin e Kosovës në të gjitha organizatat ndërkombëtare dhe rajonale.

Podgorica zyrtare e njohu Kosovën si shtet të pavarur në vitin 2008, gjatë qeverisjes së Partisë Demokratike të Socialistëve (DPS) të Millo Gjukanoviqit, i cili u zëvendësua në gusht të vitit 2020 pas tri dekadash në pushtet.