Aeroplani përplaset me një kamion në aeroportin e Manchesterit

Krahu i avionit Aurigny GR673 u ndesh me automjetin, të cilin e tërhoqi përmes pistës së avionit në Terminalin 1

Në aeroportin e Manchesterit ka ndodhur një incident i rrallë. Një aeroplan ka goditur me krahun e tij një kamion që bartte ushqim. Rreth 40 pasagjerë ishin në bord të fluturimit të “Aurigny Airlines”, por askush nuk ka pësuar lëndime.

Krahu i avionit Aurigny GR673 u ndesh me automjetin, të cilin e tërhoqi përmes pistës së avionit në Terminalin 1. Një zëdhënës i aeroportit tha: “Incidenti është i vogël, pa lëndime dhe po hetojmë me partnerët tanë të përfshirë në këtë incident”.

Ndërsa, një zëdhënës i kompanisë “Aurigny” tha se një nga krahët e avionit është dëmtuar. “Incidenti është duke u shqyrtuar nga autoritetet e aeroportit dhe inxhinierët do të vlerësojnë shkallën e dëmtimit të krahut të aeroplanit”, theksoi zëdhënësi, i cili u ka kërkuar falje udhëtarëve. Kjo ka bërë që shumë fluturime të shtyhen për pak kohë.