Ahmeti, kryebashkiaku i muajit në botë

Heqja e rrethojave të institucioneve publike, rrënimi i objekteve pa leje dhe përforcimi i praktikave të prokurimit janë disa nga arsyet për dhënien e këtij çmimi për Ahmetin

Fondacioni ndërkombëtar “The City Mayors Foundation” ka zgjedhur kryetarin e Prishtinës, Shpend Ahmeti, kryebashkiakun më të mirë të muajit janar në botë. Ky fondacion përmend disa aksione që ka marrë Ahmeti për ta kthyer kryeqytetin e Kosovës në një qytet normal.

“The City Mayors Foundation” përmend heqjen e rrethojave të institucioneve publike, rrënimin e objekteve pa leje dhe përforcimin e praktikave të prokurimit si disa nga arsyet për dhënien e këtij çmimi.

“Vendimi modest që Ahmeti e mori për heqjen e rrethojave afër objekteve publike nëpër Prishtinë për të liruar hapësirën për kalimtarët ishte një punë që i ndihmoi qytetit”, thuhet në komunikatën e fondacionit.

Sipas “The City Mayors Foundation”, administrata e Ahmtit, gjithashtu është duke vendosur shtylla dhe pemë nëpër trotuare për të parandaluar parkimin e veturave. Ky ishte një tjetër ndryshim i vogël që bëri dallim të madh në lehtësimin e jetës së qytetarëve”.

“Me fjalë tjera, kryetari Ahmeti është duke punuar shumë për të ardhmen e Prishtinës. Ai e kupton që banorët e kryeqytetit presin shumë nga administrata në vitin e tij të dytë në zyrën e kryetarit të Prishtinës. Banorët duan ndryshime të dukshme dhe të efektshme”, thuhet në disa prej arsyeve të dhënies së këtij çmimi.