Ahmeti, Kurti e Selimi vizitojnë Haradinajn

Tre përfaqësuesit e opozitës nga Lëvizja Vetëvendosje, Shpend Ahmeti-kryetari i Prishtinës së bashku me deputetët Rexhep Selimin dhe Albin Kurtin, vizituan Ramush Haradinajn në Francë

Lideri i Aleancës për ardhmërinë e Kosovës, Ramush Haradinaj, i cili po qëndron në Strasburg të Francës pas një vendimi të gjykatës franceze, sot kishte shoqëri nga Kosova. Ishin tre përfaqësuesit e opozitës nga Lëvizja Vetëvendosje, Shpend Ahmeti-kryetari i Prishtinës së bashku me deputetët Rexhep Selimin dhe Albin Kurtin, që i bënë vizitë atij.

Këtë e ka konfirmuar Shpend Ahmeti me një fotografi të publikuar në llogarinë e tij në facebook, të cilën e ka shoqëruar me një mbishkrim:

“Shfrytëzuam pushimin e pavarësisë për ta vizituar Ramush Haradinajn në Strasburg.  Mbajtja e tij në Francë është padrejtësi. Padrejtësia diku është padrejtësi gjithkund”, ka shkruar Shpend Ahmeti.

Ish-kryeministri i Kosovës, Ramush Haradinaj nga 4 janari, është duke qëndruar në Francë. Ai është ndaluar nga autoritete franceze në bazë të një fletarrestim lëshuar nga institucionet e Serbisë në vitin 2004. Gjykimi për lirimin ose ekstradimin e tij në Serbi do të mbahet me 2 mars.