Ahmeti ndez dritat festive të fundvitit

Dritat festive u ndezën në dy sheshet atë “Skënderbeu” dhe sheshin “Zahir Pajaziti”, ku edhe u prezantua Tregu i Fundviti me produkte vendore

Kryetari i komunë së Prishtinës, Shpend Ahmeti sonte ndezi dritat festive me të cilat është stolisur kryeqyteti i Kosovës, duke hapur kështu edhe tregun e fundvitit, në të cilën prezantohen për konsumatorë produktet vendore. Dritat festive u ndezën në dy sheshet atë “Skënderbeu” dhe sheshin “Zahir Pajaziti”.

Me këtë rast Ahmeti tha se ka kënaqësinë që zyrtarisht Prishtinën ta bashkëngjitë në grupin e kryeqendrave evropiane me hapjen e Tregut të Fundvitit dhe stolisjen e qytetit me drita.

“Qytetarët do të kenë rastin që të shijojnë ushqime, pije, të blejnë dhurata gjatë periudhës festive”, tha Ahmeti, sipas të cilit, shtëpizat e tregut të fundvitit janë blerë nga Komuna e Prishtinës dhe ato do të shfrytëzohen sa herë që organizohen tregje apo panaire në Prishtinë. Tregu i Fundvitit do të jetë i hapur në sheshin “Zahir Pajaziti deri më 8 janar.

Ky treg është i mbushur me produkte vendore, ndërsa komuna ka vendosur disa shtëpiza të drurit për shitjen e produkteve.