Aksident: Kosovari 19-vjeçar shkatërron tërësisht BMW-në e babait

Shoferi dhe pasagjeri që ishte me të kanë marrë lëndime të lehta nga kjo përplasje dhe janë detyruar të marrin trajtim spitalor

Të premten pasdite, një shofer i ri 19-vjeçar ka pësuar një aksident në Safenwil, kantoni Aargau. Kosovari ka treguar më vonë se kishte humbur kontrollin mbi automjetin e tij me rastin e marrjes së një kthese, shkruan polizeinews.ch.

Shoferi 19-vjeçar i ka deklaruar Policisë Kantonale të Aargau-t se ai ka qenë duke vozitur makinën BMW të babait të tij, nga Köllikeni në drejtim të Safenwilit, transmeton albinfo.ch.

Me rastin e kalimit në rrugën “Klausenpass”, ai duket se ka shpejtuar më shumë se sa duhet kur ka marrë kthesën djathtas, përcjell albinfo.ch. Si rezultat, makina e tij ka dalë jashtë rrugës dhe është përplasur në një shtyllë të mbikalimit.

Shoferi dhe pasagjeri që ishte me të kanë marrë lëndime të lehta nga kjo përplasje dhe janë detyruar të marrin trajtim spitalor.

Ndërsa automjeti ka pësuar dëm total. Rruga ku ka ndodhur aksidenti është dashur të mbahet mbyllur për rreth një orë e gjysmë për të bërë sigurimin e fakteve.

(Foto: KAPO Aargau)

---