Aksident zinxhir, dy fëmijë të vdekur

Dy fëmijë humbin jetën në aksidentin në Serbi. Policia serbe ndalon shoferin e autobusit nga Gostivari, si i dyshuar për kryerjen e veprës penale-rrezikim në komunikacion

Një aksident zinxhir me pasoja fatale, ka ndodhur sot në orët e hershme të mëngjesit në aksin rrugor Beograd-Nish, ku është përfshirë edhe një autobus me shqiptarë nga Gostivari. Në këtë aksident kanë vdekur dy fëmijë, një i moshës 1 vjeç dhe tjetri 7 vjeçar, pasi u goditën nga autobusi.

Aksidenti, siç raportoj INA, ka ndodhur rreth orës 02:30 të mëngjesit, kur fillimisht janë përplasur një makinë e tipit “Fiat” me një “BMW”, të dyja me targa të Beogradit, ndërsa pas përplasjes së tyre, një makinë e tipit “Toyota” me targa gjermane ka ndaluar shpejtësinë pasi që ka hetuar aksidentin. Mirëpo ajo nga prapa është goditur nga autobusi me targa të Gostivarit që mban linjën Gostivar – Vjenë.

Nga goditja e fuqishme, makina “Toyota” është rrokullisur, ndërsa autobusi është përplasur me një makinë tjetër të tipit “Chrysler” me targa bullgare. Në aksident më pas janë përfshirë edhe dy makina, tjera, por më së keqi kanë pësuar udhëtarët e makinës “Toyota”, ku dy fëmijë humbën jetën.

Hetuesit në bashkëpunim me policinë e komunikacionit kanë kryer ekspertizë në vendin e ngjarjes gjegjësisht në lokalitetin Velika Plana. Shoferi 48 vjeçar i autobusit, një shtetas i Maqedonisë është ndaluar nga policia si të dyshuar për rrezikim të sigurisë në komunikacion.