Aksident zinxhir: dy të vdekur 14 të lënduar

Në rrugën Mitrovicë-Prishtinë, 8 vetura janë aksidentuar në mënyrë zinxhirore. Nga përplasjet e veturave dy persona kanë humbur jetën, ndërsa 14 të tjerë janë lënduar

Një aksident i rëndë ka ndodhur sot në mëngjes në rrugën magjistrale Mitrovicë – Prishtinë në fshatin Shkabaj, ku janë përplasur në mënyrë zinxhir 8 vetura. Nga përplasjet e veturave dy persona kanë humbur jetën, ndërsa 14 të tjerë janë lënduar, prej tyre disa rëndë.

Daut Hoxha, zëdhënës në policinë e Kosovës, thotë se njëri prej personave ka vdekur në vendin e ngjarjes ndërsa tjetri ka vdekur pasi është dërguar në Qendrën Klinike Universitare të Kosovës.

Hoxha, thotë se të gjitha aksidentet kanë ndodhur për shkak të kushteve të këqija atmosferike.

“Është krijuar një shtresë e akullit në atë vend dhe ajo ka bërë që të vije deri tek aksidenti. Po ashtu edhe pakujdesia e vozitësve është njëri ndër faktorët. Nuk po respektojnë shenjat dhe nuk po i përmbahen rregullave në komunikacion”, citin KP, zëdhënësin e policisë.

Ndryshe, mediet në Kosovë kanë raportuar disa herë, se rrugët nuk po mirëmbahen nga kompanitë e kontraktuara. Ndërsa përveç këtij aksidenti fatal, gjatë ditëve të fundit janë raportuar shumë aksidente ditore, për shkaka të rrugëve me akull dhe borë.