Aksion për lirimin e pronave të uzurpuara

Aksioni i Policisë së Kosovës, është zhvilluar në dy lokacione, ndërsa pritet të vazhdojë edhe ditëve të tjera. Prona e liruar sot i takon një biznesmeni që jeton në Zvicër

Pas aksionit të javës së kaluar ku u arrestuan 52 persona për tjetërsim të pronës shoqërore, Policia e Kosovës sot nga mëngjesi ka nisur aksioni tjetër, për lirimin e pronave që dyshohet se janë të uzurpuara nga personat e fuqishëm të luftës ose bashkëpunëtor të ish-komandantëve.

Aksioni i sotëm, sipas Policisë, është zhvilluar në dy lokacione, ndërsa pritet të vazhdojë edhe ditëve të tjera.

“Policia e Kosovës në bashkëpunim më Prokurorinë dhe Agjencinë Kosovare të Privatizimit, është duke realizuar një aksion policor në dy rajone të Kosovës, që përfshinë disa lokacione për lirimin e pronave që dyshohet se janë të uzurpuara”, ka thënë Baki Kelani, zëdhënës në Policinë e Kosovës.

Ndryshe, sipas të dhënave të Agjencisë Kosovare të Privatizimit, janë 170 prona të uzurpuara, nga 116 persona fizik dhe 54 persona juridik.

“Drejtoria për Hetimin e Krimit të Organizuar, ka zhvilluar hetime intensive që nga viti i kaluar, ndaj një grupi mirë të organizuar i të dyshuarve për vepra penale të krimit të organizuar si fajde, detyrim, kanosje dhe mashtrim. Për këtë rast deri më tani janë arrestuar nëntë persona të dyshuar e të cilët janë në proces gjyqësor”, thuhet ndërkaq në një komunikatë për media lëshuar nga Policia.

Njëri nga lokalet që u lirua sot është i biznesmenit nga Drenica, Rrustem Rukolli, bashkëpunëtor dhe shok i ish komandantit nga Drenica, Sami Luishtaku. Rukolli ka disa vjet që e mban nën pronësi një lokal që ka qenë i privatizuar nga Xhevat Sadriaj, një biznesmen që jeton në Zvicër.